ប្រភពមួយពីការិយាល័យរបស់លោក Benjamin Netanyahu បាននិយាយថា លោកនាយករដ្ឋមន្ត្រីអ៊ីស្រាអែលរូបនេះ នឹងកោះប្រជុំគណៈរដ្ឋមន្ត្រីសន្តិសុខរបស់លោក នៅល្ងាចថ្ងៃព្រហស្បតិ៍ (ទី៤ ខែកក្កដា) នេះ ដើម្បីពិភាក្សាពីជំហរថ្មីរបស់ក្រុមហាម៉ាស ពាក់ព័ន្ធនឹងកិច្ចព្រមព្រៀងបទឈប់បាញ់ នៅតំបន់ហ្កាហ្សា ខណៈការប្រយុទ្ធគ្នា នៅក្នុងដែនដីនេះ នៅតែមានសភាពខ្លាំងក្លា។

ជាមួយគ្នានេះ ប្រភពដដែលនោះបានបន្តទៀតថា មុនពេលគណៈរដ្ឋមន្ត្រីជួបប្រជុំគ្នា លោក Netanyahu នឹងមានការពិភាក្សាជាមួយក្រុមចរចាបទឈប់បាញ់របស់លោកសិន។

គួរបញ្ជាក់ថា អ៊ីស្រាអែលបានទទួលការឆ្លើយតបពីក្រុមហាម៉ាស កាលពីថ្ងៃពុធ (ទី៣ ខែកក្កដា) ចំពោះសំណើមួយដែលត្រូវបានផ្សព្វផ្សាយជាសាធារណៈ កាលពីចុងខែឧសភាដោយប្រធានាធិបតីសហរដ្ឋអាមេរិក លោក Joe Biden ដែលការស្នើឡើងនោះនឹងរួមបញ្ចូលការដោះលែងចំណាប់ថ្នូរប្រហែល ១២០នាក់ដែលត្រូវបានឃុំខ្លួន នៅហ្កាហ្សា និងបទឈប់បាញ់ នៅក្នុងដែនដីប៉ាឡេស្ទីន។

មន្ត្រីប៉ាឡេស្ទីនដែលស្និទ្ធនឹងកិច្ចខិតខំប្រឹងប្រែងសម្រុះសម្រួលនេះ បានប្រាប់សារព័ត៌មាន Reuters ថា ក្រុមហាម៉ាស ដែលជាក្រុមសកម្មប្រយុទ្ធគ្រប់គ្រងតំបន់ហ្គាហ្សា បានបង្ហាញពីភាពទន់ភ្លន់លើប្រកាមួយចំនួន ដែលនឹងអនុញ្ញាតឲ្យឈានដល់កិច្ចព្រមព្រៀងគោល ប្រសិនបើអ៊ីស្រាអែលយល់ព្រម។

សូមបញ្ជាក់បន្ថែមថា ផែនការនេះមានពាក់ព័ន្ធនឹងការទាមទារឲ្យដោះលែងបណ្តើរៗនូវចំណាប់ខ្មាំងអ៊ីស្រាអែល ដែលនៅតែត្រូវបានឃុំឃាំងនៅតំបន់ហ្កាហ្សា និងការដកថយរបស់កងកម្លាំងអ៊ីស្រាអែល ក្នុងរយៈពេល ២ដំណាក់កាលដំបូង ក៏ដូចជាការដោះលែងអ្នកទោសប៉ាឡេស្ទីនផងដែរ។ ដំណាក់កាលទី៣ ទាក់ទងនឹងការស្ដារឡើងវិញនូវដែនដីដែលត្រូវបានបំផ្លាញដោយសង្រ្គាម និងការប្រគល់មកវិញនូវអដ្ឋិធាតុរបស់ចំណាប់ថ្នូដែលបានបាត់បង់ជីវិត៕