ប្រភពចំនួនបួនដែលដឹងពីបញ្ហានេះបាននិយាយថា ក្រុមហ៊ុនបរទេសមួយចំនួនកំពុងពិចារណាផ្លាស់ប្តូរបុគ្គលិកតៃវ៉ាន់ ចេញពីប្រទេសចិន បន្ទាប់ពីទីក្រុងប៉េកាំងបាននិយាយថា ខ្លួនអាចដាក់ទោសប្រហារជីវិតលើក្រុមផ្តាច់ខ្លួន «ផ្កាប់មុខ» ដែលគាំទ្រឯករាជ្យកោះតៃវ៉ាន់។

សេចក្តីណែនាំថ្មីច្បាប់នេះបានធ្វើឱ្យពលរដ្ឋតៃវ៉ាន់មួយចំនួន និងជនបរទេសចម្រុះជាតិសាសន៍ដែលកំពុងប្រតិបត្តិការនៅក្នុងប្រទេសចិន ស្វះស្វែងវាយតម្លៃហានិភ័យ និងផលប៉ះពាល់ផ្លូវច្បាប់របស់ពួកគេ នេះបើតាមប្រភព ដែលរួមមានមេធាវី និងនាយកប្រតិបត្តិពីរនាក់ ដែលដឹងផ្ទាល់អំពីការពិភាក្សា។

លោកមេធាវី ជេមស៍ ហ្ស៊ីមមឺមែន (James Zimmerman) ដែលជាដៃគូមានមូលដ្ឋាននៅទីក្រុងប៉េកាំងនៅក្រុមហ៊ុនច្បាប់ ភឺឃីនស៍ ខូអ៊ី (Perkins Coie) បាននិយាយថា «ក្រុមហ៊ុនជាច្រើននៅតែមានការព្រួយបារម្ភថា អាចមានផ្នែកប្រផេះមួយចំនួន ដូចជាការបង្ហោះប្រព័ន្ធតាមផ្សព្វផ្សាយសង្គម ឬបោះឆ្នោតឱ្យគណបក្សនយោបាយជាក់លាក់ណាមួយ ឬគាំទ្របេក្ខជននៅក្នុងការបោះឆ្នោតកោះតៃវ៉ាន់ អាចត្រូវបានបកស្រាយថាជាការចូលរួមក្នុងសកម្មភាពគាំទ្រឯករាជ្យ»។

យោងតាមការស្ទង់មតិរបស់រដ្ឋាភិបាលកោះតៃវ៉ាន់ ថ្មីបំផុតបានឱ្យដឹងថា ពលរដ្ឋតៃវ៉ាន់ប្រមាណ ១៧៧.០០០ នាក់កំពុងធ្វើការនៅក្នុងប្រទេសចិន គិតត្រឹមឆ្នាំ ២០២២។ បុគ្គលិកតៃវ៉ាន់ ត្រូវបានជួលដោយក្រុមហ៊ុនពហុជាតិសាសន៍ជាច្រើននៅក្នុងប្រទេសចិន ដោយសារសមត្ថភាពភាសា និងភាពប្រហាក់ប្រហែលនៃវប្បធម៌ជាមួយប្រទេសនេះ៕