គិតមកដល់ពេលនេះ មានរយៈពេលជាង ៧ខែមកហើយ ដែលមជ្ឈមណ្ឌល​ការងារ​ចល័ត​របស់​ទីភ្នាក់​ងារជាតិមុខរបរ និងការងារ (NEA) បានចុះផ្សព្វផ្សាយ​ឱកាស​ការងារ​នៅ​តាម​សាកល​វិទ្យាល័យ និងគ្រឹះស្ថានសិក្សានានា នៅរាជធានី ខេត្ត ដើម្បីផ្តល់ព័ត៌មានអំពីទីផ្សារការងារ ក៏ដូច​ជា​ការ​នាំ​យកឱកាសការងារឲ្យកាន់តែខិតជិតដល់យុវជន។

លោក ជិន ខិ អនុប្រធានមជ្ឈមណ្ឌលការងាររាជធានីភ្នំពេញនៃទីភ្នាក់ងារជាតិមុខរបរ និងការងារ នៃ​ក្រសួងការងារ និងបណ្តុះបណ្តាលវិជ្ជាជីវៈ ក្នុងអំ​ឡុង​ចុះ​ផ្សព្វ​ផ្សាយ​ព័ត៌មាន​ការងារ​នៅ​សាកល​វិទ្យាល័យ បៀលប្រាយ ស្ថិតនៅខណ្ឌសែនសុខ រាជធានីភ្នំពេញ នាព្រឹកថ្ងៃទី៥ ខែកក្កដានេះ បាន​ឲ្យ​ព័ត៌មាន ប៊ីធីវី ដឹងថា ការផ្សព្វផ្សាយរហូតមកដល់ពេលនេះ ឃើញមាន​ការ​ចាប់​អារម្មណ៍​ជា​ច្រើន​ពី​សំណាក់យុវជន សិស្ស និស្សិត ក៏ដូចជាអ្នកកំពុងស្វែងរកការងារល្អធ្វើ។ លើសពីនេះទៀត ក៏​ទទួល​បាន​ការ​ខល​ទូរស័ព្ទ​មក​សួរ​នាំ​អំ​ពី​ឱកាស​ការងារ​ក្នុង​មូល​ដ្ឋាន​រស់​នៅ​របស់​ប្រជាពលរដ្ឋ​ផង​ដែរ​។

លោកបានឲ្យដឹងថា ចំពោះកិច្ចសហការក្នុងការផ្សព្វផ្សាយនេះដែរ សព្វថ្ងៃ​មាន​កិច្ច​សហការ​ជាមួយ​បណ្តាសាកលវិទ្យាល័យ និងគ្រឹះស្ថានសិក្សាចំនួន២០ ហើយក៏​បាន​កត់​សម្គាល់​ឃើញ​ទៀត​ថា មានក្រុមហ៊ុនជាច្រើនផ្សេងៗទៀត បានស្នើសុំកិច្ចសហការជាមួយ NEA ដើម្បី​បង្ហាញ​អំពី​តម្រូវ​ការកម្លាំងពលកម្មគ្រប់វិស័យ និងគ្រប់មុខតំណែងផងដែរ។

ក្រុមនិស្សិតនៃសាកលវិទ្យាល័យ បៀលប្រាយ បានលើកឡើងថា អត្រាការងារសព្វថ្ងៃនេះ ពិត​ជា​មាន​ច្រើន​ណាស់ និងមិនមែនតែមួយផ្នែកទេ។ ប៉ុន្តែអ្វីដែលសំខាន់ចំពោះមុខ គឺការ​ត្រៀម​ខ្លួន​ដើម្បី​ឆ្លើយ​តបទីផ្សារការងារដែលកំពុងមានតម្រូវការ ហើយប្រសិនជាអាច យុវជនគួរ​សាក​ល្បង​ធ្វើ​ការងារសមស្របណាមួយ ដើម្បីទទួលបានបទពិសោធន៍ពីការងារ។ យុវជនទាំងនេះ បាន​និយាយ​ទៀតថា ពាក់ព័ន្ធការផ្សព្វផ្សាយព័ត៌មានទីផ្សារការងារនេះដែរ ពិតជាមានភាព​ទូលំ​ទូលា​យ​ជាង​មុន ថែមទាំងផ្តល់ឱកាសកាន់តែជាច្រើន ក្នុងការស្វែង​យល់​ពី​តម្រូវ​ការ​ការងារ​ក្នុង​ពេល​បច្ចុប្បន្ន និងអនាគត។

ដើម្បីឆ្លើយតបតម្រូវការការងារ ក៏ដូចជាផ្តល់នូវដំណោះស្រាយបញ្ហាទីផ្សារការងារ រាជ​រដ្ឋាភិបាល​កម្ពុជា​ បានបង្កើតទីភ្នាក់ងារជាតិមុខរបរនិងការងារ(NEA) ដើម្បីផ្តល់សេវាការងារ និងព័ត៌​មាន​ទី​ផ្សារ​ការងារជាសាធារណៈនៅមួយកន្លែង និងងាយស្រួលតាមរយៈប្រព័ន្ធផ្សព្វផ្សាយនានា ដូចជា តាម​រយៈគេហទំព័រ www.nea.gov.kh, ហ្វេសប៊ុក , តេឡេក្រាម និងនៅតាម​មជ្ឈ​មណ្ឌល​ការងារ​នៅរាជធានី-ខេត្ត និងរថយន្តចល័ត។ បន្ថែមពីនេះ មជ្ឈមណ្ឌលការងារចល័ត NEA បាន​បង្កើន​ការ​ចុះផ្សព្វផ្សាយឱកាសការងារនៅតាមសាកលវិទ្យាល័យ និងគ្រឹះស្ថានសិក្សានានា ឲ្យ​កាន់​តែខិ​តជិតដល់យុវជន និងអ្នកស្វែងរកការងារ ដើម្បីបង្កើន​លទ្ធ​ភាព​នៃ​ការ​ទទួល​បាន​ការងារ​កាន់​តែ​ឆាប់រហ័ស៕ អត្ថបទ ឈិត បូរ៉ាវី