ឯកឧត្តមសាស្រ្តាចារ្យ គង់ សន្យា អគ្គនាយកមន្ទីរពេទ្យកាល់ម៉ែត បានអញ្ជើញជាអធិបតីក្នុងពិធីបើក “ទិវាវេជ្ជសាស្ត្រ-សល្យសាស្ត្រ និងវិទ្យាសាស្ត្រថែទាំ លើកទី ២៦ របស់មន្ទីរពេទ្យកាល់ម៉ែត” ក្រោមប្រធានបទ "កិច្ចសហការពហុឯកទេស និងនវានុវត្តន៍ ដើម្បីគុណភាពនៃការថែទាំព្យាបាល" នាព្រឹកថ្ងៃទី៥ ខែកក្កដា ឆ្នាំ២០២៤នេះ។
ក្នុងឱកាសនោះ ឯកឧត្តមសាស្រ្តាចារ្យ គង់ សន្យា បង្ហាញការគាំទ្រយ៉ាងពេញទំហឹងចំពោះគណៈកម្មការ ដែលបានរៀបចំទិវានេះឡើងជារៀងរាល់ឆ្នាំ ក្នុងគោលបំណងជំរុញការធ្វើនវានុវត្តន៍បច្ចេកទេសសេវាព្យាបាល និងថែទាំរបស់មន្ទីរពេទ្យឈានទៅលំដាប់ខ្ពស់ជាបន្តបន្ទាប់។
ទិវាឆ្នាំនេះ ធ្វើឡើងកក្រោមប្រធានបទ “កិច្ចសហការពហុឯកទេស និងនវានុវត្តន៍ ដើម្បីគុណភាពនៃការថែទាំព្យាបាល” សម្រាប់ឆ្នាំ២០២៤នេះគឺពិតជាបង្ហាញឱ្យឃើញពីសារៈសំខាន់របស់គំហើញបច្ចេកទេសវេជ្ជសាស្ត្រតាមឯកទេសថ្មីៗ និងសេវាអមគ្លីនិក បូកផ្សំនឹងកិច្ចសហការល្អរវាងអ្នកជំនាញច្រើនបញ្ចូលគ្នា ដើម្បីបង្កើតជាសេវាព្យាបាល ឆ្លើយតបនឹងការវិវត្តន៍នៃតម្រូវការសេវាថែទាំសុខភាពរបស់ពលរដ្ឋនាពេលបច្ចុប្បន្ន។
ឆ្លៀតក្នុងឱកាសនេះ ឯកឧត្តមសាស្រ្តាចារ្យ គង់ សន្យា បានថ្លែងអរគុណចំពោះវត្ដមាន ឯកឧត្ដម លោកជំទាវ លោក លោកស្រី ភ្ញៀវកិត្តិយសទាំងអស់ ដែលបានអញ្ជើញចូលរួម ក្នុងទិវាវេជ្ជសាស្ដ្រ-សល្យសាស្ដ្រ និងវិទ្យាសាស្ត្រថែទាំលើកទី២៦ របស់មន្ទីរពេទ្យកាល់ម៉ែត ជាសក្ខីភាពបញ្ជាក់ឱ្យឃើញនូវសាមគ្គីភាពយ៉ាងស្អិតរមួតរវាងបណ្ដាអ្នកឯកទេសតាមជំនាញ ក៏ដូចជាអ្នកថែទាំ តាមរយៈការបង្ហាញនូវប្រធានបទជាច្រើន ការជជែកពិភាក្សាគ្នា និងការដកស្រង់យកបទពិសោធន៍ពីគ្នាទៅវិញទៅមក លើដំណើរជឿនលឿន ទាន់បច្ចុប្បន្នភាព នៃបច្ចេកទេសវេជ្ជសាស្ដ្រ-សល្យសាស្រ្ត និងការងារថែទាំ ជម្រុញឱ្យមានការធ្វើទំនើបកម្មកាន់តែល្អប្រសើរ៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
