ចក្រភពអង់គ្លេស នៅថ្ងៃសុក្រ (ទី៥ ខែកក្កដា) នេះ ត្រូវជួបនឹងភាពភ្ញាក់ផ្អើលផ្នែកនយោបាយ។ ក្រោយរយៈពេល ១៤ឆ្នាំ មិនមានឥទ្ធិពលផ្នែកនយោបាយនោះ ឥឡូវនេះ គណបក្សប្រឆាំង គឺគណបក្សការងារ (Labour Party) បានផ្ដល់បរាជ័យយ៉ាងធំធេងដល់ក្រុមអភិរក្សនិយមដែលកំពុងកាន់អំណាច។

មេដឹកនាំគណបក្ស លោក Keir Starmer ឥឡូវនេះ មានភាពប្រាកដប្រជា ក្នុងការក្លាយជានាយករដ្ឋមន្ត្រីនៅប៉ុន្មានម៉ោងខាងមុខនេះ ដោយជំនួសសមភាគីរបស់គណបក្សអភិរក្សនិយម គឺលោក Rishi Sunak ដែលបានធ្វើជាប្រធានក្នុងពេលចាញ់ការបោះឆ្នោតដ៏អាក្រក់បំផុតមួយ នៅក្នុងប្រវត្តិសាស្ត្រនយោបាយអង់គ្លេស។

ដោយថ្លែងទៅកាន់ហ្វូងមនុស្សដែលកំពុងធ្វើការអបអរ ក្នុងសុន្ទរកថានាពេលព្រឹកព្រលឹម នៅកណ្តាលទីក្រុងឡុងដ្រ៍ លោក Starmer បានប្រាប់ថា៖ «យើងបានធ្វើហើយ។ អ្នកបានបោះឆ្នោតឲ្យការផ្លាស់ប្ដូរ ហើយឥឡូវនេះ ការផ្លាស់ប្ដូរបានមកដល់ហើយ។ ការផ្លាស់ប្តូរចាប់ផ្តើមឥឡូវនេះហើយ»។ លោកបានអរគុណអ្នកបោះឆ្នោតទាំងអស់ ដោយនិយាយថា ពួកគេបានជួយផ្លាស់ប្តូរប្រទេសអង់គ្លេស។ លោកបាននិយាយថា៖ «នៅទីបំផុត ប្រទេសដ៏អស្ចារ្យនេះ លែងទ្រាំទ្រនឹងបន្ទុកដ៏ធ្ងន់ទៀតហើយ ហើយឥឡូវនេះ យើងអាចសម្លឹងទៅមុខជាថ្មីម្តងទៀត»។

ទំហំនៃជ័យម្នះរបស់គណបក្សការងារបានទទួលការចាប់អារម្មណ៍យ៉ាងខ្លាំង។ ការស្ទង់មតិលើអ្នកបោះឆ្នោតដែលអាចទុកចិត្តបាន ចេញផ្សាយកាលពីល្ងាចថ្ងៃព្រហស្បតិ៍ (ទី៤ ខែកក្កដា) បានបង្ហាញថា គណបក្សការងារកំពុងស្ថិតនៅលើផ្លូវ ក្នុងការទទួលបាន ៤១០អាសនៈ ពោលគឺខ្វះតែ ៨កៅអីប៉ុណ្ណោះ នឹងទទួលបានកម្រិតសរុបខ្ពស់បំផុតមិនធ្លាប់មាន។ ចំណែកក្រុមអភិរក្សនិយមត្រូវបានព្យាករថា នឹងឈ្នះត្រឹមតែ ១៣១អាសនៈ ដែលនឹងក្លាយជាលទ្ធផលដ៏អាក្រក់បំផុត នៅក្នុងប្រវត្តិសាស្ត្រជិត ២០០ឆ្នាំ។

ជ័យជម្នះរបស់គណបក្សករងារ ត្រូវបានបញ្ជាក់នៅវេលាម៉ោងប្រហែល ៥ព្រឹក ម៉ោងក្នុងស្រុក នៅពេលដែលគណបក្សនេះទទួលបានកៅអីចំនួន ៣២៦ ដែលជាចំនួនអាសនៈត្រូវការចាំបាច់ ដើម្បីមានសំឡេងភាគច្រើនក្នុងសភា។ ទំហំ ឬកម្រិតច្បាស់លាស់នៃជ័យជម្នះរបស់គណបក្សនេះ នៅតែត្រូវបានដំណើរការគណនា ខណៈដែលការរាប់សន្លឹកឆ្នោត បន្តធ្វើនៅទូទាំងប្រទេស៕