ក្រសួងប្រៃសណីយ៍និងទូរគមនាគមន៍ (ក.ប.ទ.) បានឲ្យដឹងថា កម្មវិធីបកប្រែភាសាខ្មែរប្រៃយ៍ - Machine Translations for Khmer Braille បានទទួលជ័យលាភី “Best Accessibility Award” ក្នុងកម្មវិធី “AI for Good” នៃសន្និសីទបញ្ញាសិប្បនិម្មិតពិភពលោក (World AI Conference) នៅសៀងហៃ។

ក្រសួងប្រៃសណីយ៍បានបញ្ជាក់ថា នៅថ្ងៃទី៤ ខែកក្កដា ឆ្នាំ២០២៤ “កម្មវិធី​បកប្រែ​ភាសា​ខ្មែរ​ប្រៃយ៍ - Machine Translations for Khmer Braille” ដែលអភិវឌ្ឍន៍​ដោយ​បណ្ឌិត្យ​សភា​បច្ចេក​វិទ្យា​ឌីជីថលកម្ពុជា (CADT) ក្រោមការសហការជាមួយវិទ្យាស្ថានជាតិអប់រំពិសេស បាន​ទទួល​ជ័យលាភី “Best Accessibility Award” ក្នុងកម្មវិធី “AI for Good” នៃសន្និសីទ​បញ្ញា​សិប្បនិម្មិត​ពិភព​លោក (World AI Conference) នៅទីក្រុងសៀងហៃ សាធារណរដ្ឋប្រជាមានិតចិន ដែល​រៀប​ចំ​​ឡើង​ដោយសហភាពទូរគមនាគមន៍អន្តរជាតិ (ITU) ដោយមាន​ការ​ចូលរួម​ប្រកួត​ប្រជែង​ផលិត​ផល ឬសេវាកម្មដែលប្រើប្រាស់បច្ចេកវិទ្យាបញ្ញាសិប្បនិម្មិតនៅក្នុងវិស័យសុខាភិបាល វិស័យ​កសិកម្ម វិស័យថាមពល និងវិស័យអភិបាលកិច្ច សរុបចំនួន ២១៩គម្រោង មកពីបណ្ដា​ប្រទេស​ចំនួន ៣៨។

គូសបញ្ជាក់ថា កម្មវិធីបកប្រែភាសាខ្មែរប្រៃយ៍ គឺជាបច្ចេកវិទ្យាដែ​ល​ប្រើប្រាស់​បញ្ញា​សិប្បនិម្មិត​ដើម្បី​បក​ប្រែពីភាសាខ្មែរ ទៅភាសាខ្មែរប្រៃយ៍ ហើយត្រូវបានបង្កើត​ឡើង​ជា​ពិសេស​ដើម្បី​ផ្ដល់​ភាព​ងាយ​ស្រួល​ដល់​គ្រូបង្រៀនក្នុងការរៀបចំឯកសារអានជាអក្សរខ្មែរប្រៃយ៍ជូនដល់កុមារ និង​សិស្សា​នុសិស្សដែ​លពិការភ្នែក ឬខ្សោយគំហើញឱ្យកាន់តែបានលឿន និងមានប្រសិទ្ធភាពខ្ពស់។