ស៊ីហ្គេម៖ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ នៃគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) នៅព្រឹកថ្ងៃទី២៤ ខែសីហានេះបានបន្ដដឹកនាំកិច្ចប្រជុំប្រចាំសប្ដាហ៍តាមប្រព័ន្ធ Online ដោយផ្ដោតលើរបៀបវារៈសំខាន់ៗចំនួន ៣ ពិសេសតាមដានវឌ្ឍនភាពសាងសង់ភូមិកីឡា ដែលកំពុងសម្រុកសាងសង់ក្នុងពហុកីឡដ្ឋានជាតិមរតកតេជោ ដើម្បីត្រៀមស៊ីហ្គេមនៅកម្ពុជា។
ភូមិកីឡា ឬ Sport Village គឺជាផ្នែកមួយដ៏សំខាន់នៃត្រៀមធ្វើម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ដែលគណៈកម្មាធិការជាតិ CAMSOC កំពុងយកចិត្តទុកដាក់ និងតាមដាន បន្ទាប់ពីសមិទ្ធផលធំៗជាច្រើននៅក្នុងពហុកីឡដ្ឋានជាតិមរតកតេជោ បានសាងសង់រួចរាល់ជាបន្ដបន្ទាប់ ព្រោះភូមិកីឡាត្រូវបំពេញតួនាទីយ៉ាងសំខាន់ក្នុងការស្វាគមន៍ប្រតិភូ គ្រូបង្វឹក និងអត្តពលិកខ្ទង់ ១ម៉ឺននាក់អំឡុងព្រឹត្តិការណ៍ប្រវត្តិសាស្ដ្រលើកដំបូងនៅកម្ពុជា។ បន្ទាប់ពីស្ដាប់របាយការណ៍វឌ្ឍនភាពសាងសង់ភូមិកីឡា ដែលបង្ហាញដោយថ្នាក់ដឹកនាំក្រុមហ៊ុន World Bridge Sport Village អង្គប្រជុំក៏បានប្រកាសផ្សព្វផ្សាយនូវលទ្ធផលសន្និបាតបូកសរុបការងារឆមាសទី១ និងលើកទិសដៅការងារឆមាសទី២ ក្រោមអធិបតីតភាពដ៏ខ្ពង់ខ្ពស់របស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC កាលពីថ្មីៗដល់គណៈកម្មការជំនាញ និងសហព័ន្ធកីឡាជាតិដោយឯកឧត្តម វ៉ាត់ ចំរើន អគ្គលេខាធិការ CAMSOC ផងដែរ។
សូមបញ្ជាក់ថា ភូមិកីឡាកំពុងសាងសង់លើផ្ទៃដីប្រមាណ ៨ហិចតានៅក្នុងបរិវេណពហុកីឡដ្ឋានជាតិមរតកតេជោ ដែលត្រូវសាងសង់ជាបន្ទប់ និងខុនដូសរុបជាង ១,៧០០បន្ទប់ បំពាក់ដោយគ្រឿងបរិក្ខាទំនើបៗ ហើយជាតំបន់បៃតងដែលមានទីធ្លារធំទូលាយ មានផ្សារទំនើប និងសាលធំៗអាចប្រើប្រាស់ជាការប្រកួតកីឡាបាន។ លើសពីនេះក៏មានរៀបចំសារមន្ទីរស៊ីហ្គេមដើម្បីផ្ទុកនូវអនុស្សាវរីយ៍ ដែលកម្ពុជាធ្លាប់ដណ្ដើមបានពីស៊ីហ្គេមមុនៗទៀតផង។ ភូមិកីឡាគឺជាកន្លែងស្នាក់នៅ និងហូបចុករួមដ៏ធំមួយដើម្បីត្រៀមស្វាគមន៍ប្រតិភូ និងអត្តពលិក ដែលនឹងមកចូលរួមប្រកួតកីឡាស៊ីហ្គេម និងអាស៊ានប៉ារ៉ាហ្គេមនៅកម្ពុជា ដែលរាជរដ្ឋាភិបាលបានផ្ដល់សិទ្ធដល់ក្រុមហ៊ុន World Bridge Sport Village ដើម្បីសាងសង់ឲ្យរួចរាល់មុនស៊ីហ្គេមឆ្នាំ២០២៣។ តាមផែនការក្រុមហ៊ុនបានសន្យាថា ការសាងសង់គម្រោងនេះនៅដំណាច់ឆ្នាំ២០២២ ដើម្បីប្រគល់ឲ្យគណៈកម្មាធិការជាតិ CAMSOC ប្រើប្រាស់ឲ្យបានទាន់ពេលវេលានៃកាលបរិច្ឆេទរៀបចំស៊ីហ្គេមចាប់ពីថ្ងៃទី៥-១៧ ខែឧសភា ឆ្នាំ២០២៣ និងអាស៊ានប៉ារ៉ាហ្គេមចាប់ពីថ្ងៃទី១-១០ ខែមិថុនា ឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
