លោក Suraj Pal Singh ដែលជាគ្រូស្វ័យប្រកាសផ្នែកសាសនាហិណ្ឌូ នៅថ្ងៃសៅរ៍ (ទី៦ ខែកក្កដា) នេះ បានប្រាប់ថា ពិរុទ្ធជននៅពីក្រោយការប្រជ្រៀតជាន់គ្នា នៅប្រទេសឥណ្ឌា ដែលបានសម្លាប់មនុស្ស ១២១នាក់ នឹងមិនត្រូវបានលើកលែងជាដាច់ខាត។

លោកបានបន្ថែមថា គណៈកម្មាធិការជំនឿរបស់លោក នឹងជួយដល់ជនរងគ្រោះដែលរងរបួស ក្នុងឧបទ្ទវហេតុនេះ និងសមាជិកគ្រួសារនៃអ្នកស្លាប់ ទាំងផ្នែកផ្លូវកាយ ផ្លូវចិត្ត និងហិរញ្ញវត្ថុ។

គួរបញ្ជាក់ថា ហេតុការណ៍សោកនាដកម្មនេះ បានកើតឡើងកាលពីថ្ងៃអង្គារ (ទី២ ខែកក្កដា) នៅភូមិ Phulrai Mughal Garhi ក្នុងស្រុក Hathras ភាគខាងជើងរដ្ឋ Uttar Pradesh ជាកន្លែងដែលមនុស្សប្រហែល ២៥០.០០០នាក់ បានប្រមូលផ្តុំគ្នា ដើម្បីស្តាប់ឱវាទរបស់គ្រូប្រដៅសាសនា លោក Suraj Pal Singh ដែលត្រូវបានគេស្គាល់ថា លោកគ្រូ «Bhole Baba»។

ក្នុងនាមជាសមាជិកម្នាក់នៃសហគមន៍វណ្ណៈទាប Dalit របស់ប្រទេសឥណ្ឌា គោលបំណងរបស់លោកគ្រូ Bhole Baba គឺបង្កើតសង្គមដ៏ល្អឥតខ្ចោះមួយ ដោយគ្មានអបិយជំនឿ និងពោរពេញដោយក្តីមេត្តា។ នេះបើយោងផ្ទាំងបដា ដែលបង្កើតឡើងនៅកន្លែងមានឧបទ្ទវហេតុ កាលពីថ្ងៃអង្គារនោះ៕