ភ្នំពេញ ÷ រដ្ឋាភិបាលជប៉ុន គ្រោងផ្តល់ហិរញ្ញប្បទាន និងជំនួយឥតសំណង់ ដល់ការអភិវឌ្ឍន៍ទឹកស្អាតរបស់រដ្ឋាករទឹកស្វយ័តក្រុងភ្នំពេញ ជិត ៦០០ លានដុល្លាអាមេរិកបន្ថែម សម្រាប់ការចាប់ពីពេលនេះ រហូតដល់ឆ្នាំ ២០៣០ ដើម្បីជួយគាំទ្រដល់វិស័យទឹកស្អាត ធានាដល់ការ ផ្គត់ផ្គង់ទឹកស្អាតជូនប្រជាពលរដ្ឋរស់នៅទីក្រុងភ្នំពេញ។

 ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជាទទួលបន្ទុក ជាអគ្គនាយកនៃរដ្ឋាករទឹកស្វយ័តក្រុងភ្នំពេញ លើកឡើងនៅ ក្នុងដំណើរទស្សនកិច្ចផ្លូវការរបស់លោកជំទាវ ខាមីខាវ៉ា យ៉ូកុ រដ្ឋមន្រ្តីការបរទេសជប៉ុន នៅរដ្ឋាករទឹកស្វយ័តក្រុងភ្នំពេញ ថ្ងៃទី ៦ ខែ កក្កដា ឆ្នាំ ២០២៤ នេះថា ជុំវិញវិស័យទឹកស្អាតនេះ រដ្ឋាភិបាលជប៉ុនតែងតែជួយគាំទ្រ និងគិតគូរយកចិត្តទុកដាក់បំផុត ជាពិសេស ក្នុងដំណើរទស្សនកិច្ចរបស់លោកជំទាវនៅពេលនេះ បានបង្ហាញនូវការយកចិត្តទុកដាក់ខ្ពស់ អំពីសុខភាពរបស់ប្រជាជនកម្ពុជា ជាពិសេសប្រជាពលរដ្ឋនៅរាជធានីភ្នំពេញ ព្រោះទឹកស្អាតមានសារៈសំខាន់ណាស់ ប្រសិនបើគ្មានទឹកស្អាតប្រើប្រាស់ វានឹងធ្វើឲ្យមាន ផលប៉ះពាល់ដល់សុខភាពប្រជាពលរដ្ឋ និងការបង្ករជាជំងឺឆ្លង និងការរាករុសជាដើម។

 ឯកឧត្តម បន្តថា ចំពោះដៃគូដ៏ល្អរបស់រដ្ឋាករទឹកស្វយ័តក្រុងភ្នំពេញ បានកំពុងជួយគាំទ្រអភិវឌ្ឍន៍វិស័យទឹកស្អាតរួមមាន៖ បារាំង កូរ៉េ ជាពិសេសរាជរដ្ឋាភិបាលជប៉ុន, ដែលភាគីជួយអភិវឌ្ឍន៍វិស័យទឹកស្អាតតាំងពីឆ្នាំ ១៩៩៣ ក្នុងនោះជប៉ុនបានគិតគូរវិស័យ ទឹកស្អាតនៅរាជធានីភ្នំពេញនេះយ៉ាងធំ ជាពិសេសបានផ្តល់ជំនួយឥតសំណងលើការសិក្សាគម្រោងមេ រវាង១០ឆ្នាំម្តងៗ ជាក់ស្តែងការ សិក្សារៀបចំផែនការមេជំហានទី៣នេះ គឺបានគ្របដណ្តាប់ពីឆ្នាំ ២០២១ ដល់ឆ្នាំ ២០៣០ ពោលគឺជប៉ុនបានជួយលើការសិក្សា និង ជួយដល់រដ្ឋាករទឹកស្វយ័តក្រុងភ្នំពេញ ទៅលើគម្រោងទាំងអស់ ក្នុងនោះបើតាមការប៉ាន់ស្មានទាំងហិរញ្ញប្បទានប្រតិបត្តិការ និងជំនួយ ឥតសំណង មកដល់ពេលនេះមានចំនួនជាង ២០០ លានដុល្លារអាមេរិក ក្នុងនោះចំពោះផែនការបន្ត ជប៉ុនគ្រោងផ្តល់ហិរញ្ញប្បទាន និងជំនួយឥតសំណង់ ដល់ការអភិវឌ្ឍន៍វិស័យទឹកស្អាតតរបស់រដ្ឋាករទឹកស្វយ័តក្រុងភ្នំពេញ ចាប់ពីពេលនេះរហូតដល់ឆ្នាំ ២០៣០ មាន ឋចំនួនជិត ៦០០ លានដុល្លារបន្ថែម ដើម្បីធានាដល់ការផ្គត់ផ្គង់ទឹកស្អាតជូនប្រជាពលរដ្ឋរស់នៅទីក្រុងភ្នំពេញ។

សូមបញ្ជាក់ថា ចំពោះផែនការផលិតទឹកស្អាតរបស់រដ្ឋាករទឹកស្វយ័តក្រុងភ្នំពេញ នៅក្នុងឆ្នាំ ២០២៤ នេះ សម្រាប់រោងចក្រផលិតទឹក ចំនួន ៨ កន្លែង នឹងមានសមត្ថភាពផលិតជាង ១ លានម៉ែត្រគូប ក្នុងមួយថ្ងៃ ។ ដើម្បីធានាការផ្គត់ផ្គង់ទឹកស្អាតឲ្យស្របតាមតម្រូវ ការប្រើប្រាស់របស់ប្រជាពលរដ្ឋ នៅតំបន់សេវាដែលមានស្រាប់ និងតំបន់សេវាថ្មី ក្នុងនោះរដ្ឋាករទឹកស្វយ័តក្រុងភ្នំពេញ គ្រោងផលិត និងផ្គត់ផ្គង់ទឹកស្អាតប្រចាំឆ្នាំឲ្យបានចំនួនជាង ៣១១ លានម៉ែត្រគូប ដែលជាមធ្យមផលិតទឹកស្អាតប្រមាណ ៨៥០ ពាន់ម៉ែត្រគូប ក្នុង មួយថ្ងៃ ដោយបរិមាណទឹកនៅក្នុងឆ្នាំ២០២៤ នេះ មានកំណើនកើនឡើងប្រមាណ ១១ ភាគរយ បើធៀបបរិមាណទឹកនិងឆ្នាំ២០២៣ ក្នុងនោះបើគិតពីចំនួនផ្គត់ផ្គង់ជូនប្រជាជននៅរាជធានីភ្នំពេញ បានក្នុងរង្វង់ប្រមាណ ៨៥ ភាគរយ ចំណែកនៅសល់ ១៥ ភាគរយ រដ្ឋាករទឹកស្វយ័តក្រុងភ្នំពេញ រួមជាមួយនិងដៃគូរួមមាន៖ បារាំង កូរ៉េ និងជប៉ុន នឹងធានាធ្វើយ៉ាងណាអនុវត្តន៍ឲ្យសម្រេចតាម គម្រោងទុក និងការចង់បានរបស់រាជរដ្ឋាភិបាលកម្ពុជា៕

អត្ថបទ៖ សុន រ៉ាឌី