​បាល់ទាត់៖ ​អ្នកចាត់ការ​សញ្ជាតិ​អេ​ស្ប៉ា​ញ Mikel Arteta ត្រូវបាន Arsenal ទុកពេល​ឱ្យ ៦​សប្តាហ៍​ទៀត​ដើម្បី​ស្តារ​កិត្តិយសរបស់ខ្លួន នេះ​បើតាម​ការចុះផ្សាយ​របស់​សារព័ត៌មាន Telegraph​។ ​​Mikel Arteta បានចាប់ផ្តើម​អាជីព​បង្វឹក​របស់ខ្លួន​នៅ​ឆ្នាំ២០១៦ ដោយ​នៅពេលនោះ​គឺជា​ជំនួយការ​លោក Pep Guardiola នៅ Manchester City​។​

​​បន្ទាប់ពី​ចំណាយពេល​ធ្វើការ​ជាមួយ​អ្នកចាត់ការ ​ដែលមាន​ស​ម​ត្ថ​ភាព​ខ្ពស់បំផុត​ម្នាក់​នោះ Mikel Arteta ក៏​ចាប់ផ្តើម​បើក​ទំព័រ​ជា​អ្នកចាត់ការ​ធំ​របស់ខ្លួន​ជាមួយ Arsenal នៅ​ឆ្នាំ២០១៩ ដោយ​បន្ត​តំណែង​ពី​លោក Unai Emery ដែល​ត្រូវបាន​បណ្តេញចេញ​។ ​​ការមកដល់​របស់ Arteta ក៏មាន​ចំនុច​ខ្ពស់ និង​ទាប​ដែរ​ដោយ​ធ្លាប់​លើក​ពាន FA Cup នៅ​ឆ្នាំ២០២០ តែ​ក៏​មិន​ឡើង​ផុតពី​លេខ៨ ដែរ​នៅ English Premier League​។​ ​រដូវ​កាល​ថ្មី​នេះ​ទៀតសោត Arsenal ចាប់ផ្តើម​មិន​ដូច​អ្វីដែល​រំពឹងទុក បន្ទាប់ពី​ចាញ់​ពីរ​ប្រកួត​ជាប់​គ្នា​រួមមាន​ចាញ់នៅផ្ទះ Brentford និង​ចាញ់ Chelsea ២-០ ដូចគ្នា​។

​សារព័ត៌មាន Telegraph បានឱ្យដឹងថា Arteta មានឱកាស​ស្រោចស្រង់​តំណែង​របស់ខ្លួន​រហូត​ដល់​ខែតុលា មានន័យថា Arteta ត្រូវ​ដឹកនាំ ៦ប្រកួត​ក្នុង​រយៈពេល ៦សប្តាហ៍​នេះ​ឱ្យ​បានល្អ​រួមមាន​ប្រកួត​ពាន Carabao Cup នៅ​ទឹកដី West Brom មុនពេល​ជួប​ក្រុម​ម្ចាស់ផ្ទះ​ការពារ​ជើង​ឯក Manchester City​។​ ​បន្ទាប់​ពីនេះ Arsenal ត្រូវ​ជួប Norwich City, Burnley, Tottenham Hotspur និង Brighton​។​ ​ប្រសិនជា​ដឹកនាំ​មិន​បានល្អ​តំណែង Arteta អាច​នឹងត្រូវ​ជំនួស​ដោយ​លោក Antonio Conte ដែល​កំពុង​នៅ​ទំនេរ​៕

​អត្ថបទ​៖​នាង សុភា​វុ​ធ