ប្រទេសកូរ៉េខាងត្បូង នៅថ្ងៃចន្ទ (ទី៨ ខែកក្កដា) នេះ បានប្រាប់ឲ្យដឹងថា ខ្លួននឹងទម្លាក់ផែនការ ដើម្បីព្យួរអាជ្ញាប័ណ្ណរបស់វេជ្ជបណ្ឌិត និងគ្រូពេទ្យហាត់ការដែលធ្វើកូដកម្ម ដោយនេះជាឥរិយាបថផ្តល់សម្បទានមួយ ដើម្បីបញ្ចប់ការតវ៉ារយៈពេលជាច្រើនខែ ដែលជំរុញដោយការសម្រេចរបស់រដ្ឋាភិបាល ក្នុងការបង្កើនការចំនួននិស្សិតចូលរៀននៅសាលាពេទ្យ។

ក្រុមគ្រូពេទរាប់ពាន់នាក់ ដែលក្នុងនោះរាប់បញ្ចូលទាំងអ្នកហាត់ការផ្នែកវេជ្ជសាស្រ្ត និងបញ្ចប់ការសិក្សាផ្នែកពេទ្យ បានដើរចេញពីការងារក្នុងខែកុម្ភៈ ដោយការធ្វើបែបនោះបង្ខំឲ្យមន្ទីរពេទ្យធំៗកាត់បន្ថយការផ្តល់សេវាមិនសង្គ្រោះបន្ទាន់ និងមិនទួលយកអ្នកជំងឺចូលបន្ទប់សង្គ្រោះបន្ទាន់។

រដ្ឋមន្ត្រីសុខាភិបាលកូរ៉េខាងត្បូង លោក Cho Kyoo-hong បាននិយាយថា រដ្ឋាភិបាល បានសម្រេចមិនព្យួរអាជ្ញាប័ណ្ណរបស់វេជ្ជបណ្ឌិតដែលធ្វើកូដកម្មនោះឡើយ មិនថា ពួកគេចូលធ្វើការវិញ ឬអត់។ លោកវេជ្ជបណ្ឌិត Cho បាននិយាយថា ការសម្រេចទម្លាក់ចោលការគំរាមកំហែងនៃវិធានការដាក់ទណ្ឌកម្មរបស់ខ្លួននេះ គឺចាំបាច់ ពីព្រោះបញ្ចប់ការខ្វះខាត ក្នុងសេវាវេជ្ជសាស្រ្តបច្ចុប្បន្ន គឺមាន «ភាពបន្ទាន់ជាង»។

គួរបញ្ជាក់ថា ២ភាគ៣នៃគ្រូពេទ្យបញ្ចប់ការសិក្សា និងគ្រូពេទ្យហាត់ការរបស់កូរ៉េខាងត្បូង បានដើរចេញពីការងារ ដើម្បីតវ៉ានឹងផែនការបង្កើនចំនួនសិស្សឲ្យចូលរៀននៅសាលាពេទ្យជារៀងរាល់ឆ្នាំចំនួន ២.០០០នាក់ ក្នុងគោលបំណង ដើម្បីដោះស្រាយអ្វីដែលរដ្ឋាភិបាលនិយាយថា កង្វះខាតក្រុមគ្រូពេទ្យ។

វេជ្ជបណ្ឌិតវ័យក្មេងដែលកំពុងតវ៉ាទាំងអស់ និយាយថា រដ្ឋាភិបាលគួរតែដោះស្រាយបញ្ហាប្រាក់ខែ និងលក្ខខណ្ឌការងារជាមុនសិន មុននឹងព្យាយាមបង្កើនចំនួនគ្រូពេទ្យនោះ៕