ក្រសួងពាណិជ្ជកម្មចិនបាននិយាយកាលពីថ្ងៃចន្ទថា សម្ដីរបស់មន្ត្រីសហភាពអឺរ៉ុប ដែលបង្ហាញថា ប្រទេសចិនពុំបានស្វែងរកការពិភាក្សាអំពីការដំឡើងពន្ធលើរថយន្តអគ្គិសនី (EV) រហូតមកដល់ពេលថ្មីៗនេះ បើទោះបីជាសហភាពអឺរ៉ុបបានព្យាយាមចូលរួមជាច្រើនខែក៏ដោយនោះ គឺពិតជាមិនស៊ីសង្វាក់គ្នាទៅនឹងការពិតទាល់តែសោះ។

ក្នុងការឆ្លើយតបទៅនឹងការស៊ើបអង្កេតប្រព័ន្ធផ្សព្វផ្សាយដែលដកស្រង់សម្តីរបស់លោក ចច តូឡេដូ អាល់ប៊ីណាណា(Jorge Toledo Albinana) ឯកអគ្គរដ្ឋទូតសហភាពអឺរ៉ុបប្រចាំនៅប្រទេសចិន អ្នកនាំពាក្យរបស់ក្រសួងខាងលើ បាននិយាយថា ប្រទេសចិនបានបង្ហាញការប្រឆាំងយ៉ាងម៉ឺងម៉ាត់ក្នុងឱកាសទ្វេភាគី និងពហុភាគីចាប់តាំងពី សហភាពអឺរ៉ុប បានចាប់ផ្តើមការស៊ើបអង្កេតប្រឆាំងនឹងការឧបត្ថម្ភធនរបស់ចិនចំពោះរថយន្តអគ្គិសនី របស់ខ្លួនកាលពីខែតុលាឆ្នាំ២០២៣ ។

អ្នកនាំពាក្យរូបនេះបាននិយាយថា ប្រទេសចិនបានបង្ហាញពីភាពស្មោះត្រង់បំផុតរបស់ខ្លួន ដោយបន្ថែមថា ប្រទេសចិនសង្ឃឹមថាភាគីអឺរ៉ុបនឹងខិតខំប្រឹងប្រែងរួមគ្នា បង្ហាញពីភាពស្មោះត្រង់របស់ខ្លួន ជំរុញដំណើរការពិគ្រោះយោបល់ និងឈានដល់ដំណោះស្រាយដែលអាចទទួលយកបានទៅវិញទៅមកឱ្យបានឆាប់តាមដែលអាចធ្វើទៅបាន។

ចិនប្រឆាំងដាច់ខាតរាល់ការអនុវត្តឯកតោភាគីនិយម និងគាំពារនិយម ដែលយកមកធ្វើជាបញ្ហានយោបាយ ឬយកបញ្ហាពាណិជ្ជកម្មធ្វើជាអាវុធ ដោយកត់សម្គាល់ថា ជាការឆ្លើយតបទៅនឹងសកម្មភាពណាមួយដែលបំពានច្បាប់ និងគាបសង្កត់ប្រទេសចិន ប្រទេសនេះនឹងចាត់វិធានការចាំបាច់ទាំងអស់ដើម្បីការពារផលប្រយោជន៍ផ្ទាល់ខ្លួន៕