​ស្នូកឃ័រ៖ ​កីឡាករ​ស្នូកឃ័រ​ជើងចាស់ Mark Williams បាន​ក្លាយជា​ជើងឯក​ការប្រកួត​ពានរង្វាន់ British Open ជា​លើក​ទី២ ក្នុង​អាជីព​ក្រោយ​យកឈ្នះ Gary Wilson នៅ​វគ្គ​ផ្តាច់ព្រ័ត្រ​។ បន្ទាប់ពី Wilson នាំមុខ ៣-២ហ្វ្រេ​ម Mark Williams បាន​វាយបក​ ២​ហ្វ្រេ​ម​មកវិញ​ក្រោយ​វាយ​មួយ​ឈើ​បាន ៧៥ពិន្ទុ និង ១១៥ពិន្ទុ​ដើម្បី​មុខ​វិញ ៤-៣​។​

​​ក្រោយមក Gary Wilson ធ្វើ​មិន​បានល្អ​ឡើយ​នៅពេល​វាយ​គ្រាប់​ផ្កាឈូក​មិន​ចូល​នៅ​ហ្វ្រេ​ម​ចុងក្រោយ ស្របពេលជើងឯក​ពិភពលោក ៣សម័យ Mark Williams ក្តោប​យក​ឱកាស​នេះ​ដើម្បី​យកឈ្នះ​ការប្រកួត​សរុប​លទ្ធផល​ចុងក្រោយ ៦-៤​។​ ​កីឡាករ​សញ្ជាតិ​វែ​ល Mark Williams បាន​និយាយថា ​លោក​ឈ្នះ​ពាន​នេះ​ដោយ​សំណាង ពោលគឺ​លោក​គិតថា​ ២ហ្វ្រេ​ម​នៅ​វគ្គ​ផ្តាច់ព្រ័ត្រ​នេះ​លោក​សមតែ​ចាញ់ តែ​សំណាង​បែ​ជា​ឈ្នះ​ទៅវិញ​។​

នេះ​ជា​ជើងឯក British Open លើក​ទី២ ក្នុង​អាជីព​របស់ Mark Williams និង​ជា​ពាន​លំដាប់ Ranking លើក​ទី២៤ ផងដែរ​ដែល​នៅពេលនេះ Williams ឈ្នះ​ពាន​ក្នុង Ranking ២លើក​ពីលើ Judd Trumps និង​មានតែ Ronnie O’Sullivan ទេ​ឈ្នះ​សរុប ៣៧លើក, Stephen Hendry ៣៦លើក, John Higgins ៣១លើក និង Steve Davis ២៨លើក​។​ ​​ចំណែក​ការប្រកួត​ពានរង្វាន់ British Open នេះ​ជាការ​រៀបចំ​ដំបូង​ក្រោយ​អវត្តមាន​អស់​រយៈពេល ១៧ឆ្នាំ​។ ​បន្ទាប់ពី British Open នេះ​ស្នូកឃ័រ​នឹង​បន្ត​ឈានដល់​ការប្រកួត​ពាន Northern Ireland Open នៅ​ដើមខែ​តុលា​៕

​អត្ថបទ​៖​នាង សុភា​វុ​ធ