គ្រាន់តែទទួលដំណឹងពីមរណភាពរបស់កុមារីទាំងបីនាក់ ដែលបានលង់ទឹកស្រះស្លាប់ នៅចំណុចស្រះទឹក ភូមិទួលក្រសាំង សង្កាត់រការខ្ពស់ ក្រុងតាខ្មៅ ខេត្តកណ្តាល នាព្រឹកថ្ងៃទី៩ ខែកក្កដា ឆ្នាំ២០២៤ បន្ទាប់ពីការចូលរួមពិធីបុណ្យរុក្ខទិវា នៅខេត្តតាកែវ រួចមក សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងជាតំណាងរាស្រ្តមណ្ឌលខេត្តកណ្តាល បានអញ្ជើញចូលរួមដោយផ្ទាល់ ពិធីបុណ្យសពកុមារីទាំងបី និងបានចូលរួមរំលែកមរណទុក្ខដ៏ក្រៀមក្រំ សោកស្តាយជាពន់ពេកជាមួយក្រុមគ្រួសារសព។
កុមារី គង់ ទេវី ភេទស្រី អាយុ១៣ឆ្នាំ កុមារី ម៉ាលី ម៉ានិកា អាយុ១២ឆ្នាំ និងកុមារី រត្ន័ ម៉ាយ៉ា អាយុ១៣ឆ្នាំ បានលង់ទឹកស្លាប់នៅចំណុចខាងលើ កាលពីថ្ងៃទី៨ ខែ កក្កដា ឆ្នាំ២០២៤។ អាជ្ញាធរមានសមត្ថកិច្ច ក្រោយទទួលដំណឹងពីការបាត់ខ្លួនកុមារីទាំងបី បានចុះអន្តរាគមន៍ស្វែងរកកុមារីទាំងបី នៅក្នុងស្រះទឹកដែលកើតហេតុ កាលពីរាត្រីថ្ងៃទី៨ ខែកក្កដា។ ប៉ុន្តែអ្វីៗបានហួសពេលទៅហើយ កុមារីទាំងបីទំនងបានចុះងូតទឹកស្រះ និងបានលង់ទឹកស្លាប់បាត់បង់អាយុជីវិតតាំងពីពេលរសៀលមកម្ល៉េះ។
សពកុមារីទាំងបី ត្រូវបានឪពុកម្តាយយកមកតម្កល់រៀបចំពិធីបុណ្យតាមប្រពៃណីសាសនា តាមគ្រួសារនីមួយៗ ផ្សេងៗគ្នា។
សម្តេចរដ្ឋសភាធិបតី ឃួន សុដារី បានចូលរួមសោកស្តាយជាពន់ពេក គ្មានអ្វីប្រៀបបានចំពោះការបាត់បង់អាយុជីវិតកុមារីទាំងបី ដែលជាទីស្រឡាញ់នៃក្រុមគ្រួសារនីមួយៗ។ នាឱកាសនោះ សម្តេចបានចូលបច្ច័យ និងសម្ភារៈមួយចំនួនសម្រាប់រៀបចំពិធីបុណ្យជូនដល់ក្រុមគ្រួសារសពនីមួយៗ ផងដែរ។
សម្តេចប្រធានរដ្ឋសភា បានអំពាវនាវដល់បងប្អូនប្រជាពលរដ្ឋទាំងអស់ យកចិត្តទុកដាក់មើលថែកូនតូចៗរបស់ខ្លួនជាប់ជាប្រចាំ ដោយមានការប្រុងប្រយ័ត្នជាប់ជានិច្ច មិនគួរបណ្តោយឱ្យពួកគេទៅណាឆ្ងាយ ឬទៅកន្លែងណាដែលមានគ្រោះថ្នាក់នោះឡើយ ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
