វិមានក្រឹមឡាំង នៅថ្ងៃអង្គារ (ទី៩ ខែកក្កដា) នេះ បាននិយាយថា មិនមែនរុស្ស៊ីវាយប្រហារត្រូវមន្ទីរពេទ្យកុមារ ក្នុងទីក្រុងគីវ កាលពីថ្ងៃចន្ទ (ទី៨ ខែកក្កដា) នោះឡើយ តែផ្ទុយទៅវិញ ការបាញ់ប្រឆាំងមីស៊ីលរបស់អ៊ុយក្រែនឯណោះទេ ដែលធ្លាក់ត្រូវមន្ទីរពេទ្យដ៏សំខាន់នេះ។

អ្នកនាំពាក្យវិមានក្រឹមឡាំង លោក Dmitry Peskov មិនបានផ្តល់ភស្តុតាង ដើម្បីគាំទ្រការអះអាងនេះទេ ប៉ុន្តែបានប្រាប់អ្នកសារព័ត៌មានថា៖ «ខ្ញុំសុំនិយាយដដែលៗថា យើងមិនធ្វើការវាយប្រហារលើគោលដៅជនស៊ីវិលនោះទេ»។

គួរបញ្ជាក់ថា អាជ្ញាធរអ៊ុយក្រែនបាននិយាយថា ប្រទេសរុស្ស៊ីបានវាយប្រហារមន្ទីរពេទ្យកុមារដ៏សំខាន់ នៅទីក្រុងគីវ ដោយមីស៊ីល កាលពីថ្ងៃទី៨ ខែកក្កដា និងបានបាញ់ស្រោចដូចភ្លៀងទៅលើទីក្រុងផ្សេងទៀតនៅទូទាំងប្រទេសអ៊ុយក្រែន ដោយបានសម្លាប់ជនស៊ីវិលយ៉ាងហោចណាស់ ៤១នាក់ ដែលជាការវាយប្រហារបង្ហូរឈាមតាមអាកាស ក្នុងរយៈពេលជាច្រើនខែ។

សេវាសន្តិសុខអ៊ុយក្រែន បានប្រាប់ថា មីស៊ីល Kh-101 Kalibr របស់រុស្ស៊ី បានវាយប្រហារមន្ទីរពេទ្យ ហើយភស្តុតាងនៃការវាយប្រហារនេះ ត្រូវបានរកឃើញនៅទីតាំងនោះ ជាពិសេសបំណែកនៃផ្នែកខាងក្រោយនៃមីស៊ីលដែលមានលេខរៀងសម្ងាត់ និងផ្នែកមួយនៃប្រព័ន្ធណែនាំ។

នៅឯសន្និសីទប្រចាំថ្ងៃរបស់លោក លោក Peskov ត្រូវបានសួរថា តើរុស្ស៊ីអាចនិយាយថា ខ្លួនមិនវាយប្រហារគោលដៅជនស៊ីវិល បន្ទាប់ពីសោកនាដកម្មនៅឯមន្ទីរពេទ្យនេះដែរ ឬទេ។ លោកបានប្រាប់ថា៖ «ខ្ញុំសូមជំរុញឲ្យអ្នកទាំងអស់គ្នាតាមដានសេចក្តីថ្លែងការណ៍របស់ក្រសួងការពារជាតិរុស្ស៊ី ដែលបដិសេធយ៉ាងដាច់អហង្ការថា មានការវាយប្រហារលើគោលដៅជនស៊ីវិល និងដែលលើកឡើងថា យើងកំពុងនិយាយអំពីការបាញ់ប្រព័ន្ធប្រឆាំងមីស៊ីលខុសបច្ចេកទេស។ យើងសូមបន្តទទូចថា យើងមិនវាយប្រហារលើគោលដៅស៊ីវិលនោះទេ»៕