បាល់ទាត់៖ មន្ត្រីជាន់ខ្ពស់បាល់ទាត់តំបន់អាស៊ានបានប្រាប់ BTV News កាលពីថ្ងៃទី២៤ ខែសីហាថា មកដល់ពេលនេះមាន ៤ប្រទេសហើយដែលចង់ប្រជែងធ្វើជាម្ចាស់ផ្ទះការប្រកួតកីឡាបាល់ទាត់ពានរង្វាន់តំបន់អាស៊ីអាគ្នេយ៍ ២០២០ ដែលពន្យារពេលដោយសារកូវីដ-១៩។
ឯកឧត្តម ខៀវ សាម៉េត ប្រធានសហព័ន្ធបាល់ទាត់តំបន់អាស៊ីអាគ្នេយ៍បានមានប្រសាសន៍ថា ក្រៅពីព្រះរាជាណាចក្រកម្ពុជា ប្រទេសសិង្ហបុរី ថៃ និងឥណ្ឌូនេស៊ីសុទ្ធតែបានបង្ហាញបំណងប្រជែងធ្វើជាម្ចាស់ផ្ទះការប្រកួត AFF Suzuki Cup 2020 នេះ។ ដំបូងបាល់ទាត់ពានរង្វាន់តំបន់អាស៊ាន ២០២០ គ្រោងធ្វើពីថ្ងៃទី២៣ ខែវិច្ឆិការដល់ថ្ងៃទី៣១ ខែធ្នូ ឆ្នាំ២០២០។ ប៉ុន្តែការប្រកួតត្រូវបានពន្យារពេល និងរៀបចំកម្មវិធីប្រកួតឡើងវិញពីរដងដោយសារតែជំងឺរាត្បាតសកលកូវីដ-១៩ ដោយត្រូវលេងពីថ្ងៃទី១១ ខែមេសាដល់ថ្ងៃទី៨ ខែឧសភា ឆ្នាំ២០២១ ហើយចុងក្រោយនេះគ្រោងលេងពីថ្ងៃទី០៥ ខែធ្នូ ឆ្នាំ២០២១ ដល់ថ្ងៃទី០១ ខែមករា ឆ្នាំ២០២២វិញ។ ថ្មីៗនេះ ឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានបង្ហាញពីបំណងចូលរួមដេញថ្លៃធ្វើម្ចាស់ផ្ទះពានរង្វាន់ AFF Suzuki Cup 2020 ក្នុងសន្និបាតបូកសរុបការងារឆមាសទី១ និងលើកទិសដៅបន្ដការងារឆមាសទី២ ឆ្នាំ២០២១ របស់ CAMSOC។
តាមការបញ្ជាក់របស់ឯកឧត្តម គោលបំណងនៃការចង់ចូលរួមដេញថ្លៃធ្វើម្ចាស់ផ្ទះពានរង្វាន់ធំប្រចាំតំបន់នេះ ដោយស្នើរៀបចំការប្រកួតនៅពហុកីឡដ្ឋានជាតិមរតកតេជោ គឺដើម្បីអបអរសាទរ និងផ្សព្វផ្សាយនូវសមិទ្ធផលដ៏អស្ចារ្យនៃសំណង់ប្រវត្តិសាស្ដ្រដ៏មហាសាលនេះ ក៏ដូចជាការសាកល្បង និងពង្រឹងសមត្ថភាពកីឡាករសម្រាប់ការប្រកួតកីឡាស៊ីហ្គេមនៅវៀតណាម ពិសេសស៊ីហ្គេមឆ្នាំ២០២៣ នៅកម្ពុជាផងដែរ។ មកដល់ពេលនេះ សហព័ន្ធបាល់ទាត់កម្ពុជាមិនទាន់បានដាក់ពាក្យនៅឡើយ ខណៈរង់ចាំការសម្រេចពីរាជរដ្ឋាភិបាលតាមរយៈគណៈកម្មាធិការជាតិអូឡាំពិក នូវការលើកលែងវិធានការកូវីដ-១៩ មួយចំនួនពិសេសការធ្វើចត្តាឡីស័ក ខណៈឯកសារបានត្រៀមរួចរាល់ហើយ។ ចំនែកប្រទេសបីដែលត្រូវប្រជែងធ្វើម្ចាស់ផ្ទះដែរនោះ ពេលនេះបានដាក់ពាក្យរួចរាល់ហើយ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
