បាល់ទាត់៖ ​ខ្សែការពារ​សញ្ជាតិ​ស្កុ​ត​ឡេ​ន Andy Robertson បាន​ប្តេជ្ញា​ចំពោះ​អនាគត​របស់ខ្លួន​ជាមួយ​ហង្ស​ក្រហម Liverpool រហូតដល់​ឆ្នាំ២០២៦ បន្ទាប់ពី​ចុះហត្ថលេខា​លើ​កិច្ចសន្យា​ថ្មី​រយៈពេល ៥ឆ្នាំ​នៅ​ថ្ងៃ​ចន្ទ​ម្សិលមិញ​។​

​​ប្រធាន​ក្រុម​របស់​ក្រុម​ជំរើសជាតិ​ស្កុ​ត​ឡេ​ន​រូបនេះ ​នៅសល់​កិច្ចសន្យា​ចាស់​របស់ខ្លួន ៣ឆ្នាំ​ទៀត​ជាមួយ Liverpool បន្ទាប់​កិច្ចសន្យា​ចុងក្រោយ​បំផុត​កាលពី​ឆ្នាំ២០១៩​។ ​កីឡាករ​វ័យ ២៧ឆ្នាំ​រូបនេះ​បាន​ក្លាយជា​កីឡា​ករទី៥ ដែល​បាន​បន្ត​កិច្ចសន្យា​ថ្មី​ជាមួយ Liverpool បន្ទាប់ពី​ខ្សែការពារ​អង់គ្លេស Trent Alexander-Arnold, Fabinho, Alisson Becker និង Virjil van Dijk​។ Andy Robertson បាន​ក្លាយខ្លួនជា​កីឡាករ​ដែលមាន​ឥទ្ធិពល​ម្នា​ក់នៅ Liverpool និង​ក្រុម​ជំរើសជាតិ​ស្កុ​ត​ឡេ​នចាប់តាំងពី​ផ្ទេរ​មកកាន់ Liverpool នៅ​ឆ្នាំ២០១៧ ពី Hull City ក្នុង​តំលៃ ៨លាន​ផោន​។​

​​Liverpool ក៏​សង្ឃឹមថានឹង​ជោគជ័យ​ក្នុង​ការបន្ត​កិច្ចសន្យា​ ជាមួយ​កីឡាករ​សំខាន់ៗ​ផ្សេងទៀត​ដូចជា Mohamed Salah, Jordan Henderson និង Sadio Mane ជាដើម​។​​ Liverpool ក៏មាន​កីឡាករ​ ២រូប​ចាកចេញ​រួមមាន Georginio Wijnaldum ទៅ PSG និង Xherdan Shaqiri ទៅ Lyon ក្នុង​តំលៃ ៩.៥លាន​ផោន​។ ​ក្រៅពីនោះ Liverpool អាច​នឹង​បាត់​បត់​កីឡាករ​ ២រូប​មុនពេល​ទីផ្សា​ដោះដូរ​កីឡាករ​បិទ​បញ្ចប់​គឺ Divock Origi និង Nathaniel Phillips៕

​អត្ថបទ​៖​នាង សុភា​វុ​ធ