ក្រុមអ្នកជំនាញសិទ្ធិមនុស្សឯករាជ្យ ដែលទទួលបន្ទុកដោយអង្គការសហប្រជាជាតិ បាននិយាយកាលពីថ្ងៃអង្គារ (០៩ កក្កដា) ថា ការស្លាប់ថ្មីៗរបស់កុមារជាច្រើននាក់ទៀតដោយសារកង្វះអាហារូបត្ថម្ភនៅតំបន់ហ្កាហ្សាស្ទ្រីប បង្ហាញថាគ្រោះទុរ្ភិក្សបានរីករាលដាលពាសពេញតំបន់ហ៊ុមព័ទ្ធនេះហើយ។

អាជ្ញាធរសុខាភិបាលហ្កាហ្សាបាននិយាយថា យ៉ាងហោចណាស់មានកុមារចំនួន ៣៣ នាក់បានស្លាប់ដោយសារកង្វះអាហារូបត្ថម្ភ ដែលភាគច្រើននៅតំបន់ភាគខាងជើង ដែលរហូតមកដល់ពេលថ្មីៗនេះបានប្រឈមមុខនឹងភាពធ្ងន់ធ្ងរនៃយុទ្ធនាការយោធាអ៊ីស្រាអែល ដែលបានចាប់ផ្តើមបន្ទាប់ពីការវាយប្រហាររបស់ពួកហាម៉ាស កាលពីថ្ងៃទី០៧ ខែតុលា ទៅលើភាគខាងត្បូងអ៊ីស្រាអែល។

ចាប់តាំងពីដើមខែឧសភាមក សង្រ្គាមបានរីករាលដាលដល់តំបន់ហ្កាហ្សាភាគខាងត្បូង ដោយបានប៉ះពាល់លំហូរជំនួយចូលទៅក្នុងតំបន់នេះ ស្របពេលមានការរឹតបន្តឹងពីអ៊ីស្រាអែល ខណៈយោធា បានចោទទីភ្នាក់ងារអង្គការសហប្រជាជាតិ ថាមិនបានចែកចាយការផ្គត់ផ្គង់ប្រកបដោយប្រសិទ្ធភាព។

ក្រុមអ្នកជំនាញនិយាយថា «ជាមួយនឹងការស្លាប់របស់កុមារទាំងនេះដោយសារភាពអត់ឃ្លាន ទោះបីទទួលបានការព្យាបាលក៏ដោយ នេះបង្ហាញឱ្យឃើញថាគ្រោះទុរ្ភិក្សបានរីករាលដាលចាប់ពីភាគខាងជើង ទៅកាន់ភាគកណ្តាល និងភាគខាងត្បូងហ្កាហ្សាទាំងមូលហើយ»។

សេចក្តីថ្លែងការណ៍របស់ពួកគេដែលត្រូវបានចុះហត្ថលេខាដោយអ្នកជំនាញ បានថ្កោលទោស «យុទ្ធនាការបង្អត់អាហារដោយចេតនា និងគោលដៅរបស់អ៊ីស្រាអែល ប្រឆាំងនឹងប្រជាជនប៉ាឡេស្ទីន»។ បេសកកម្មការទូតរបស់អ៊ីស្រាអែល នៅទីក្រុងហ្សឺណែវ បាននិយាយថា សេចក្តីថ្លែងការណ៍នេះស្មើនឹង «ព័ត៌មានមិនពិត»៕