ប្រធានាធិបតីកេនយ៉ា លោក William Ruto កាលពីថ្ងៃអង្គារ បានប្រកាសថា វេទិកាពហុវិស័យថ្នាក់ជាតិនឹងត្រូវធ្វើឡើង នៅថ្ងៃទី១៥ ខែកក្កដា ដើម្បីដោះស្រាយបញ្ហាដែលលើកឡើងដោយយុវជនរបស់ប្រទេសនេះ ដែលបង្កឲ្យមានការតវ៉ារយៈពេលបីសប្តាហ៍ នៅទូទាំងប្រទេស។

លោក Ruto បានថ្លែងថា វេទិការយៈពេល ៦ថ្ងៃ ដែលបានស្នើឡើងនោះ នឹងពិភាក្សាលើបញ្ហានានា ក្នុងនោះមាន ការងារ គោលការណ៍ពន្ធដារ បំណុលជាតិ របាយការណ៍ និងគណនេយ្យភាព និងវិធានការប្រឆាំងអំពើពុករលួយ។

លោកបាននិយាយនៅទីក្រុងណៃរ៉ូប៊ី ជារដ្ឋធានីរបស់ប្រទេសនេះថា៖«យើងមានការពិគ្រោះយោបល់ និងបានព្រមព្រៀងថា យើងនឹងធ្វើឲ្យវេទិកាពហុវិស័យរីកចម្រើនទៅមុខ ក្នុងអំឡុងកិច្ចប្រជុំមួយដែលប្រមូលផ្តុំក្រុមមេដឹកនាំបក្សប្រឆាំង ក្នុងនោះមានអតីតនាយករដ្ឋមន្ត្រី Raila Odinga ផងដែរ។ 

ការអត្ថាធិប្បាយរបស់លោកប្រធានាធិបតី បានធ្វើឡើង បន្ទាប់ពីមានការតវ៉ាប្រឆាំងរដ្ឋាភិបាលរយៈពេល បីសប្តាហ៍ថ្មីៗនេះ នៅទូទាំងប្រទេស ដែលបង្កឡើងដោយច្បាប់ស្តីពីហិរញ្ញវត្ថុឆ្នាំ ២០២៤ ដ៏ចម្រូងចម្រាស ដែលក្រោយមកត្រូវបានដកចេញពីសភា។ ការតវ៉ាដែលដឹកនាំដោយក្រុមបាតុករភាគច្រើន រហូតមកដល់ពេលនេះ បានបណ្តាលឲ្យមនុស្សយ៉ាងតិច ៤១ នាក់ស្លាប់ និងជាង ៣៦០ នាក់ផ្សេងទៀត រងរបួស។ នេះបើយោងតាមគណៈកម្មការសិទ្ធិមនុស្សជាតិកេនយ៉ា ដែលផ្តល់មូលនិធិដោយរដ្ឋ។