កាលពីថ្ងៃអង្គារម្សិលមិញ សាកសពមនុស្សមានចំនួនកាន់តែច្រើនក្នុងមន្ទីរពេទ្យ Nasser ស្ថិតនៅតំបន់ភាគខាងត្បូងហ្កាហ្សា ស្របពេលដែលក្រុមហាម៉ាស់ ព្រមានថា ការវាយប្រហារថ្មីរបស់អ៊ីស្រាអែល អាចនឹងបង្កគ្រោះថ្នាក់ដល់កិច្ចប្រជុំស្វែងរកបទឈប់បាញ់ ។ 

ក្រុមមន្រ្តីសុខភាពប៉ាឡេស្ទីន និយាយថា ការវាយប្រហារថ្មីរបស់អ៊ីស្រាអែល បានសម្លាប់មនុស្សរាប់សិបនាក់ ដែលភាគច្រើននៃពួកគេគឺជាស្រ្តី និងកូនក្មេង ។ 

ការវាយប្រហារតាមច្រកអាកាសរបស់អ៊ីស្រាអែល ត្រូវចំសំពត់តង់គ្រួសារជម្លៀសខ្លួននៅក្រៅសាលារៀន ស្ថិតក្នុងទីក្រុង Abassan នៅភាគខាងកើតទីក្រុង Khan Younis ហើយក្រុមមន្រ្តីសុខភាពប៉ាឡេស្ទីន និយាយថា មនុស្សយ៉ាងហោច ២៩នាក់ ត្រូវបានសម្លាប់ ។ 

ស្របពេលនោះដែរ ក្រុមអ្នកស្រុក និយាយថា រថក្រោះនៅទីក្រុងហ្កាហ្សា បានផ្លោងគ្រាប់កាំភ្លើងធំលើអគារ និងដងផ្លូវ ជាហេតុបង្ខំឲ្យពួកគេជម្លៀសខ្លួនចេញពីផ្ទះសម្បែង ។ 

ការវាយប្រហារបែបនេះ បានកើតមានឡើង ក្រោយយោធាអ៊ីស្រាអែល បញ្ជាឲ្យជនប៉ាឡេស្ទីន ជម្លៀសខ្លួនចេញពីស្រុកជាច្រើននៅតំបន់ភាគខាងកើត និងតំបន់ភាគខាងលិចទីក្រុងហ្កាហ្សា ។ 

កាលពីថ្ងៃអាទិត្យ និងថ្ងៃចន្ទកន្លងទៅ ក្រុមអឌ្ឍចន្ទក្រហមប៉ាឡេស្ទីន បានជម្លៀសអ្នករងរបួសចេញពីទីក្រុងហ្កាហ្សា ប៉ុន្តែនៅថ្ងៃពុធនេះ ពួកគេនិយាយថា បុគ្គលិករបស់ពួកគេពុំអាចឆ្លើយតបបានឡើយចំពោះការទូរស័ព្ទសុំការសង្រ្គោះ ដោយសារតែការទម្លាក់គ្រាប់បែកតានតឹងខ្លាំងពេក ៕