រដ្ឋមន្ត្រីការពារជាតិអ៊ីស្រាអែល លោក យ៉ូអាវ ហ្គាឡែនធ៍ ( Yoav Gallant) និយាយថា កងកម្លាំងការពារអ៊ីស្រាអែល (IDF) បានសម្លាប់ ឬបង្កឲ្យរបួស ៦០ភាគរយនៃភេរវករហាម៉ាស ហើយថា កងវរសេនាតូចរបស់អង្គការឥស្លាមភាគច្រើន ត្រូវបានកម្ទេច។

លោក ហ្គាឡែនធ៍ បានធ្វើអត្ថាធិប្បាយទៅកាន់សភា កាលពីថ្ងៃពុធ។ នេះបើយោងតាមប្រព័ន្ធផ្សព្វផ្សាយ   អ៊ីស្រាអែល។

អ៊ីស្រាអែល បានប្រកាសការបំផ្លិចបំផ្លាញទាំងស្រុងនៃក្រុមហាម៉ាស ជាគោលដៅសង្រ្គាម បន្ទាប់ពីការសម្លាប់រង្គាល ធ្វើឡើងដោយក្រុមហាម៉ាស និងក្រុមជ្រុលនិយមដទៃទៀត នៅថ្ងៃទី ៧ ខែតុលា។

មន្ត្រីអ៊ីស្រាអែល បាននិយាយថា ដរាបណាក្រុមហាម៉ាស រក្សាការកាន់កាប់នៅតំបន់ហ្កាហ្សាស្ទ្រីប ក្រុមនេះ អាចកសាង និងពង្រឹងខ្លួនវាឡើងវិញបាន មានន័យថា កងកម្លាំងការពារអ៊ីស្រាអែល (IDF) នឹងត្រូវត្រឡប់មកវិញ និងប្រយុទ្ធនៅក្នុងតំបន់ដែលខ្លួនបានដាក់ពង្រាយរួចហើយនោះ។

លោក ហ្គាឡែនធ៍ បានអំពាវនាវឲ្យមានការបង្កើតជម្រើសនយោបាយមួយចំពោះការគ្រប់គ្រងរបស់ក្រុម ហាម៉ាស នៅតំបន់ហ្កាហ្សាស្ទ្រីប។ ទោះបីជាយ៉ាងណាក៏ដោយ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ រហូតមកដល់ពេលនេះ បានបដិសេធមិនបង្ហាញផែនការសម្រាប់ការគ្រប់គ្រង និងការកសាងឡើងវិញនូវតំបន់ហ្កាហ្សា បន្ទាប់ពីបញ្ចប់សង្រ្គាម។

ក្រុមអ្នកសង្កេតការណ៍ និយាយថា នេះទំនងជាដោយសារតែលោកកំពុងព្យាយាមជៀសវាងជម្លោះ ជាមួយដៃគូចម្រុះស្តាំនិយមរបស់ខ្លួន ដែលពេញចិត្តនឹងការកសាងការតាំងទីលំនៅរបស់អ៊ីស្រាអែល នៅតំបន់ហ្កាហ្សាស្ទ្រីប ដែលជាសំណើដ៏ចម្រូងចម្រាសបំផុត។