នាយករដ្ឋមន្រ្តីប៉ាឡេស្ទីន លោក ម៉ូហាម៉េដ មូស្តាហ្វា ( Mohammad Mustafa) កាលពីថ្ងៃពុធ បានអំពាវនាវឲ្យមានការបង្រួបបង្រួមប៉ាឡេស្ទីន នៅក្រោមអាជ្ញាធរ និងរដ្ឋាភិបាលតែមួយ នៅពេលដែលបទឈប់បាញ់ ត្រូវបានឈានដល់ នៅតំបន់ហ្កាហ្សា។

ក្នុងអំឡុងជំនួបជាមួយមន្ត្រីអង្គការសហប្រជាជាតិ ស្ថានកុងស៊ុល និងឯកអគ្គរដ្ឋទូត នៅទីក្រុង រ៉ាម៉ាឡា (Ramallah) លោក មូស្តាហ្វា បានសង្កត់ធ្ងន់លើតម្រូវការសម្រាប់ការរួបរួម និងកិច្ចសហប្រតិបត្តិការ។

សេចក្តីថ្លែងការណ៍ពីការិយាល័យរបស់ខ្លួនដែលត្រូវបានផ្ញើទៅសារព័ត៌មានស៊ីនហួ បានឲ្យដឹងថា លោក មូស្តាហ្វា បាននិយាយថា៖«ថ្ងៃបន្ទាប់ពីសង្គ្រាមបានបញ្ចប់ ប៉ាឡេស្ទីន ត្រូវតែរួបរួមគ្នា ក្រោមអាជ្ញាធរតែមួយ និងរដ្ឋាភិបាលមួយ ដោយធ្វើការជាមួយដៃគូជាក្រុមតែមួយ ជាមួយនឹងផែនការតែមួយ។ ពុំអាចមានសម័យអន្តរកាល ដែលមិនបានកំណត់ដែលនឹងបង្កើតភាពស្មុកស្មាញ និងចលាចលបន្ថែមទៀតទេ»។ 

លោក បានជំរុញឲ្យដៃគូអន្តរជាតិ ម្ចាស់ជំនួយ និងស្ថាប័នអង្គការសហប្រជាជាតិ សម្របសម្រួលយ៉ាងជិតស្និទ្ធជាមួយរដ្ឋាភិបាលប៉ាឡេស្ទីន ដើម្បីធានាឲ្យមានការងើបឡើងវិញយ៉ាងឆាប់រហ័ស និងដោះស្រាយតម្រូវការមនុស្សធម៌ជាបន្ទាន់ ដែលបណ្តាលមកពីជម្លោះនៅតំបន់ហ្កាហ្សា និងផលប៉ះពាល់របស់វា នៅក្នុងតំបន់វេសបែង។

លោកនាយករដ្ឋមន្ត្រី បានលើកឡើងពីការទទួលខុសត្រូវយូរអង្វែងរបស់អាជ្ញាធរប៉ាឡេស្ទីន ក្នុងការផ្តល់សេវាសំខាន់ៗដូចជាការថែទាំសុខភាព ការអប់រំ ទឹក និងអគ្គិសនី ដល់ប្រជាជននៅតំបន់ហ្កាហ្សា បើទោះបីជាអ៊ីស្រាអែលដកខ្លួនចេញពីមូលនិធិប៉ាឡេស្ទីនក៏ដោយ។