មេធាវីរបស់លោក ដូណាល់ ត្រាំ (Donald Trump) កាលពីថ្ងៃព្រហស្បតិ៍ (១១ កក្កដា) បាន​និយាយ​ថា រដ្ឋអាជ្ញានៅទីក្រុង មែនហាតថាន (Manhattan) បានពឹងផ្អែកដោយមិន​ត្រឹមត្រូវ​លើ​ភស្តុតាង​នៃសកម្មភាពផ្លូវការរបស់អតីតប្រធានាធិបតីសហរដ្ឋអាមេរិករូបនេះ ក្នុងការផ្តន្ទា​ទោស​លោក​លើ​បទព្រហ្មទណ្ឌ ដែលផ្តើមចេញពីប្រាក់បំបិទមាត់ឱ្យតារាអាសអាភាសម្នាក់។

នៅក្នុងឯកសារតុលាការចុះថ្ងៃទី១០ ខែកក្កដា ប៉ុន្តែត្រូវបានផ្សព្វ​ផ្សាយ​ជា​សាធារណៈ​នៅ​ថ្ងៃ​ព្រហស្បតិ៍ មេធាវីការពារក្តីនិយាយថា សាលក្រមមានទោសកាលពីថ្ងៃទី៣០ ខែឧសភា គួរតែត្រូវ​បាន​លុប​ចោល បន្ទាប់ពីសេចក្តីសម្រេចរបស់តុលាការកំពូលស្តីពីអភ័យឯកសិទ្ធិប្រធានាធិបតី។

ពួកគេបាននិយាយថា ភ័ស្តុតាងនៃ​ទង្វើផ្លូ​វការ​ដែល​ត្រូវ​បាន​បង្ហាញ​ដោយ​មិន​ត្រឹម​ត្រូវ​ដល់​គណៈ​វិនិច្ឆ័យ​ទាំងនោះរួមមាន ការសន្ទនារបស់លោក Trump ជាមួយអតីតជំនួយការសេតវិមាន លោក​ស្រី ហូប ហ៊ីកស៍ (Hope Hicks) និងការបង្ហោះតាមបណ្ដាញសង្គម ធ្វីតធឺ (Twitter) មួយ​ចំនួន​របស់​លោក Trump នៅពេលលោកកាន់តំណែងពីឆ្នាំ២០១៧ ដល់ឆ្នាំ២០២១។

លោកចៅក្រម ហ័ន មើឆាន (Juan Merchan) ក្នុងខែនេះបាន​ពន្យា​រ​ពេល​ការ​កាត់​ទោស​របស់​លោក Trump ទៅពីរខែខាងមុខ បន្ទាប់ពីមេធាវីការពារក្តីនិយាយថា សេចក្តីសម្រេចថ្ងៃទី០១ ខែកក្កដា របស់តុលាការ​ដែល​ថា​ប្រធានាធិបតី​មិន​អាច​ប្រឈម​មុខ​នឹង​ការ​ចោទ​ប្រកាន់​ព្រហ្ម​ទណ្ឌ​លើ​សកម្មភាពផ្លូវការ មានន័យថារដ្ឋអាជ្ញាមិនគួរលើកយកភស្តុតាងក្នុងពេលលោក Trump កំពុង​កាន់​តំណែង​នៅសេតវិមាន មកក្នុងការកាត់ក្តីឡើយ។

សេចក្តីសម្រេចរបស់តុលាការកំពូលបាននិយាយថា ភ័ស្តុតាងនៃទង្វើ​ផ្លូវ​ការ​របស់​ប្រធានាធិបតី​មិន​អាច​​ប្រើក្នុងការកាត់ក្តីលើបញ្ហាឯកជនបានទេ។ មេធាវីការពារក្តីរបស់លោក Trump បាននិយាយ​ថា សេចក្តីសម្រេចនេះមានន័យថា សាលក្រមរបស់គណៈវិនិច្ឆ័យ មិនមានជំហរផ្លូវច្បាប់ឡើយ៕