រដ្ឋមន្ត្រីការបរទេសចិន លោក វ៉ាង យី (Wang Yi) បាននិយាយក្នុងការហៅទូស័ព្ទជាមួយសមភាគីហូឡង់ថា ប្រទេសចិន នឹងមិនទទួលយក «ការចោទប្រកាន់គ្មានមូលដ្ឋាន» ដែលធ្វើឡើងប្រឆាំងនឹងខ្លួននៅក្នុងកិច្ចប្រជុំកំពូលរបស់អង្គការណាតូ (NATO) ក្នុងសប្តាហ៍នេះនៅទីក្រុងវ៉ាស៊ីនតោន នោះទេ។

លោក Wang បាននិយាយថា ចិនមានឆន្ទៈក្នុងការរក្សាទំនាក់ទំនងជាមួយណាតូ លើ «ជំហរស្មើគ្នា» និងធ្វើការផ្លាស់ប្តូរលើមូលដ្ឋាននៃការគោរពគ្នាទៅវិញទៅមក ដោយស្នើឱ្យសម្ព័ន្ធយោធានេះកុំជ្រៀតជ្រែកកិច្ចការផ្ទៃក្នុង ឬប្រជែងផលប្រយោជន៍របស់ខ្លួន។ លោកបាននិយាយថា ប្រទេសចិន និងប្រទេសណាតូ មានប្រព័ន្ធនយោបាយ និងគុណតម្លៃខុសៗគ្នា ប៉ុន្តែនេះមិនគួរជាហេតុផលដែលណាតូ ប្រើយកមក «ញុះញង់ឱ្យមានការប្រឈមមុខដាក់គ្នាជាមួយចិន» ឡើយ។

លោក Wang បន្ថែមថា ចិនជឿថា ហូឡង់នឹងលើកទឹកចិត្តសហភាពអឺរ៉ុបឱ្យមើលមកចិនដោយចេតនាល្អ និងសមហេតុផល ហើយដើរតួនាទីស្ថាបនាក្នុងការរក្សាការអភិវឌ្ឍប្រកបដោយសុខភាពល្អ និងស្ថិរភាពនៃទំនាក់ទំនងចិន-សហភាពអឺរ៉ុប។

ប្រទេសចិន កាលពីថ្ងៃព្រហស្បតិ៍ បានរិះគន់សេចក្តីប្រកាសនៃកិច្ចប្រជុំកំពូលរបស់អង្គការណាតូ ដែលបានពណ៌នាថាខ្លួនជា «អ្នកជួយ» ដល់កិច្ចខិតខំប្រឹងប្រែងសង្គ្រាមរបស់រុស្ស៊ីនៅអ៊ុយក្រែន ថាមានភាពលំអៀង និង «សាបព្រួសជម្លោះ»។ អ្នកនាំពាក្យក្រសួងការបរទេសបាននិយាយថា «ការបំភ្លើស» របស់អង្គការណាតូ ចំពោះតួនាទីរបស់ចិន ក្នុងវិបត្តិអ៊ុយក្រែន «ធ្វើឡើងដោយចេតនាព្យាបាទ»៕