គ្រឹះស្ថានសិក្សារដ្ឋមួយចំនួននៅរាជធានីភ្នំពេញ បានចាប់ផ្ដើមអនុវត្តការបង្រៀនភាសាចិនដល់​សិស្សរបស់ខ្លួន ខណៈការសិក្សាភាសាចិន នេះជាការសិក្សាក្នុងម៉ោងសិក្សាភាសាបរទេស ដែល​សាលាផ្ដល់ជូនជាជម្រើសបន្ថែម ដើម្បីបង្កើនសមត្ថភាពសិក្សាភាសារបស់សិស្ស។

កម្មវិធីសិក្សារដ្ឋ បានកំណត់ភាសាអង់គ្លេស និងភាសាបារាំង ជាភាសាបរទេស ដែលក្រសួងអប់រំ យុវជន និងកីឡា បានដាក់ចូលក្នុងកម្មវិធីសិក្សា។ ភាសាបរទេសទាំងពីរនេះ គឺមានបង្រៀនសម្រាប់សិស្សចាប់ពីថ្នាក់ទី ៤ឡើងទៅ។ ទន្ទឹមនឹងមានការបង្រៀនភាសាអង់គ្លេស និងភាសាបារាំងនេះ គ្រឹះស្ថានសិក្សារដ្ឋមួយចំនួន ក៏បានអនុវត្តការសិក្សាភាសាចិន ជាជម្រើសបន្ថែមសម្រាប់សិស្សរបស់ខ្លួនផងដែរ។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានលើកឡើងថា ការសិក្សាភាសាចិននេះ បច្ចុប្បន្នកំពុងអនុវត្តនៅមជ្ឈមណ្ឌលសិក្សាទំនើប ៨ទីតាំង និងមានការបង្រៀន នៅសាលារៀនគោលដៅចំនួន ២០ផ្សេងទៀត នៅរាជធានីភ្នំពេញ និងខេត្តព្រះសីហនុ។ ទន្ទឹមគ្នានេះដែរ សាលារៀនជំនាន់ថ្មី ក៏កំពុងពិភាក្សា លើការផ្ដួចផ្ដើម ដាក់បន្ថែមការសិក្សាភាសាចិនផងដែរ។

លោក សូ ធី នាយកបឋមសិក្សាចតុមុខ បានលើកឡើងថា ការសិក្សាភាសាចិននេះ សម្រាប់មជ្ឈមណ្ឌលសិក្សាទំនើបក្នុងពេលបច្ចុប្បន្ន គឺកំពុងអនុវត្តសម្រាប់សិស្សចាប់ផ្ដើមតាំងពីថ្នាក់ទី ១មកម្លេះ។ លោកបន្តថា សាលាបានដាក់បន្ថែមភាសាចិន ជាចាំបាច់បន្ទាប់ពីភាសាអង់គ្លេស ហើយសាលាក៏បានបូកបន្ថែមថ្នាក់រ៉ូបូត ក៏ដូចជាកំព្យូទ័រ ដើម្បីបង្កើនសមត្ថភាពសិស្ស ឱ្យមានភាពរួចរាល់ មានភាពខ្លាំងសម្រាប់ការប្រកួតប្រជែងនាពេលអនាគត។

ចំពោះកុមារដែលកំពុងសិក្សាភាសាចិន ពួកគេក៏ពេញចិត្តនឹងសិក្សាភាសាបរទេសនេះដែរ។ កុមារប្រុសស្រីពីររូប កំពុងសិក្សានៅមជ្ឈមណ្ឌលសិក្សាទំនើប ចតុមុខ លើកឡើងថា បច្ចុប្បន្នពួកគេអាចប្រើប្រាស់ទាំងភាសាខ្មែរ ភាសាអង់គ្លេស និងភាសាចិន។ ពួកគេមើលឃើញថា ការសិក្សាភាសាចិននឹងផ្ដល់អត្ថប្រយោជន៍កាន់តែច្រើនសម្រាប់ពួកគេនៅពេលអនាគត។ 

សូមជម្រាបថា ការសិក្សាភាសាចិន នៅគ្រឹះស្ថានសិក្សារដ្ឋនេះ ជាជម្រើសភាសាបរទេសបន្ថែម។ បច្ចុប្បន្នភាសាបរទេស ដែលក្រសួងអប់រំ យុវជន និងកីឡា បានកំណត់ក្នុងកម្មវិធីសិក្សារដ្ឋ គឺមានតែភាសាអង់គ្លេស និងភាសាបារាំងប៉ុណ្ណោះ។ សិស្សត្រូវរៀន ភាសាអង់គ្លេស ឬភាសាបារាំង ចាប់ផ្ដើមពីកម្រិតបឋមសិក្សា នៅថ្នាក់ទី ៤រហូតដល់បញ្ចប់ថ្នាក់វិទ្យាល័យ៕ អត្ថបទ៖ គឹម ហុក