ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយ ស.ស.យ.ក. វិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ បានរៀបចំសិក្ខាសាលាពិគ្រោះយោបល់ស្តីពី កិច្ចសហការជាមួយនិយោជក និងភាគីពាក់ព័ន្ធ ដែលមានការចូលរួមពីតំណាងក្រុមហ៊ុន សហគ្រាស និងគ្រឹះស្ថាន នានាចំនួន៧៤ នាព្រឹកថ្ងៃទី១២ ខែកក្កដា ឆ្នាំ២០២៤នេះ។

ប្រភពទីភ្នាក់ងារជាតិមុខរបរ និងការងារ បានបញ្ជាក់ថា សិក្ខាសាលានេះ ត្រូវបានរៀបចំឡើង​ក្នុង​គោលបំណង ដើម្បីពង្រឹង និងពង្រីកកិច្ចសហការ រវាង NEA និងវិស័យឯកជន លើការប្រមូល និង​ផ្សព្វផ្សាយពីឱកាសការងារឲ្យកាន់តែទូលំទូលាយដល់យុវជន សិស្ស/និស្សិត និង​អ្នក​ស្វែង​រកការងារ ក៏ដូចជាជំរុញក្រុមហ៊ុន សហគ្រាស និងគ្រឹះស្ថាននានា ឲ្យប្រើប្រាស់សេវាការងាររបស់ NEA ទាំងដោយផ្ទាល់ និងតាមប្រព័ន្ធឌីជីថល ក្នុងការផ្គត់ផ្គង់តម្រូវការពលកម្ម កាន់តែល្អប្រសើរ ចំណេញពេលវេលានិងមានប្រសិទ្ធភាពខ្ពស់ និងដើម្បីផ្លាស់ប្តូរព័ត៌មាន និងទទួលយកមតិត្រលប់​ពីវិស័យឯកជនដើម្បីកែលម្អសេវាការងារឲ្យកាន់តែប្រសើរឡើង៕