ប្រព័ន្ធផ្សព្វផ្សាយ KCNA បាននិយាយនៅថ្ងៃសៅរ៍ ទី១៣ ខែកក្កដានេះ ដោយដកស្រង់សម្តីរបស់អ្នកនាំពាក្យក្រសួងការបរទេសថា កូរ៉េខាងជើង «រិះគន់យ៉ាងខ្លាំង» ចំពោះ សេចក្តីប្រកាសនៅក្នុងកិច្ចប្រជុំកំពូលរបស់សម្ព័ន្ធយោធាណាតូ នាពេលថ្មីៗនេះ។

មេដឹកនាំនៃបណ្តាប្រទេសសម្ព័ន្ធយោធាណាតូ បានបញ្ជាក់លើការសន្យាសមាជិកភាពសម្រាប់អ៊ុយក្រែន និងបានប្រកាន់ជំហរកាន់តែខ្លាំងលើការគាំទ្ររបស់ប្រទេសចិនសម្រាប់រុស្ស៊ី ក្នុងសេចក្តីប្រកាសមួយនៅសប្តាហ៍នេះ ក្នុងកិច្ចប្រជុំកំពូលនៅទីក្រុងវ៉ាស៊ីនតោន។

សេចក្តីប្រកាសនៅកិច្ចប្រជុំកំពូល បានចោទប្រកាន់ប្រទេសអ៊ីរ៉ង់ និងប្រទេសកូរ៉េខាងជើងថា បានបញ្ឆេះសង្គ្រាមរុស្ស៊ីនៅអ៊ុយក្រែន ដោយផ្តល់ការគាំទ្រផ្នែកយោធាដោយផ្ទាល់ដល់ទីក្រុងមូស្គូ ហើយបានអំពាវនាវឱ្យប្រទេសចិន បញ្ឈប់រាល់ការគាំទ្រផ្នែកសម្ភារៈ និងនយោបាយ សម្រាប់កិច្ចខិតខំប្រឹងប្រែងសង្គ្រាមរបស់រុស្ស៊ី។

សេចក្តីថ្លែងការណ៍របស់កូរ៉េខាងជើង នៅថ្ងៃសៅរ៍នេះបាននិយាយថា ខ្លួនច្រានចោល «សេចក្តីប្រកាស» ដែលបានចាត់ទុកថា ឯកសារខុសច្បាប់រំលោភលើសិទ្ធិស្របច្បាប់នៃរដ្ឋអធិបតេយ្យឯករាជ្យ និងជាគោលនយោបាយនៃការប្រឈមមុខដាក់គ្នា ដែលញុះញង់ឱ្យមានសង្គ្រាមត្រជាក់ថ្មី និងការប្រឈមមុខដាក់គ្នាផ្នែកយោធា នៅលើសកលលោក។

ដោយឡែក ប្រទេសកូរ៉េខាងត្បូង និងសហរដ្ឋអាមេរិក នៅក្រៅកិច្ចប្រជុំកំពូលរបស់អង្គការណាតូ បានចុះហត្ថលេខាលើគោលការណ៍ស្តីពីការបង្កើតប្រព័ន្ធរួមបញ្ចូលគ្នា នៃការរារាំងបន្ថែម សម្រាប់ឧបទ្វីបកូរ៉េ ដើម្បីប្រឆាំងការគំរាមកំហែងនុយក្លេអ៊ែរ និងយោធា ពីប្រទេសកូរ៉េខាងជើង។