បាល់ទាត់៖ បន្ទាប់ពីផ្អាកការប្រកួតអស់រយៈពេល ៣សប្ដាហ៍ លីគកំពូលកម្ពុជាឆ្នាំ២០២១ នឹងបន្ដការប្រកួតនាចុងសប្ដាហ៍នេះហើយ ដោយក្រុមភ្នំពេញក្រោនត្រូវបើកទ្វារផ្ទះទទួលសមាគមកីឡាបាល់ទាត់កងយោធពលខេមរភូមិន្ទ (Tiffy Army) មុនគេនាល្ងាចថ្ងៃទី២៩ ខែសីហា នៅកីឡដ្ឋាន Smart RSN។
នេះគឺជាការប្រកួតតែមួយគត់សម្រាប់ការត្រឡប់មកវិញ នៃលីគកំពូលកម្ពុជានាចុងសប្ដាហ៍នេះ ហើយក៏ជាការប្រកួតបង្គ្រប់សប្ដាហ៍ទី៦ ផងដែរ បន្ទាប់ពីជំនួបរវាងក្រុមភ្នំពេញក្រោន និងក្រុមកងយោធពលខេមរភូមិន្ទត្រូវបានពន្យារពេលម្ដងហើយម្ដងទៀត ដោយសារបញ្ហាកូវីដ-១៩។ ដោយឡែកគូប្រកួតបន្ទាប់ក៏ជាការប្រកួតបង្គ្រប់សប្ដាហ៍ទី៦ ដែរគឺជាការជួបគ្នារវាងក្រុមសូលទីឡូអង្គរ និងក្រុមនគរបាលជាតិដែលត្រូវធ្វើឡើងនារសៀលថ្ងៃទី០១ ខែកញ្ញាខាងមុខនៅកីឡដ្ឋាន SRU ខេត្តសៀមរាប។ ការប្រកួតដំបូងឡើយត្រូវប្រកួតតាំងពីដើមខែកក្កដាមកម្ល៉េះ ប៉ុន្ដែដោយសារកូវីដបានបង្ខំការប្រកួតរវាងក្រុមទាំងពីរ ត្រូវពន្យារពេលរហូតមកដល់សប្ដាហ៍ក្រោយ។
គួរដឹងថា លីគកំពូលកម្ពុជាត្រូវបានផ្អាកការប្រកួតជាថ្មី ចាប់ពីដើមខែសីហារហូតមកដល់បច្ចុប្បន្ន ក្រោយផ្ទុះជំងឺកូវីដបំប្លែងថ្មីប្រភេទដែលតា(Delta) ក្នុងសហគមន៍ ហើយតាមការគ្រោងទុកការប្រកួតសប្ដាហ៍ទី១២ នឹងធ្វើឡើងនាចុងសប្ដាហ៍ក្រោយ ជាមួយការអនុវត្តវិធានការសុខាភិបាលដ៏តឹងរឹងដើម្បីការពារ និងទប់ស្កាត់ជំងឺដ៏កាចសាហាវនេះ។ ក្រឡេកទៅមើលតារាងពិន្ទុក្នុងជុំទី១ បណ្ដោះអាសន្នវិញ គេឃើញ ៥ក្រុមឈរលំដាប់កំពូលតារាងមានពិន្ទុយ៉ាងប្រកៀកប្រកិតគ្នា រួមមានវិសាខា បឹងកេត អង្គរថាយហ្គឺរ ព្រះខ័នរាជស្វាយរៀង និងណាហ្គាវើលដ៏ ខណៈភ្នំពេញក្រោនឈរលេខរៀងទី៦ និងមាន ១៨ពិន្ទុក្នុងដៃ ចាញ់ប្រៀបក្រុមកំពូលតារាង ៤ពិន្ទុ ប៉ុន្ដែពួកគេទើបប្រកួតបាន ៨លើកប៉ុណ្ណោះ៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
