ភ្នំពេញ ៖ គម្រោងអភិវឌ្ឍន៍ថ្នាក់ជាតិ ជាប្រព័ន្ធលូបង្ហូរទឹកមុខកាត់ធំៗ ចន្លោះពី១,៥០ម៉ែត្រ ដល់៤ម៉ែត្រ បាននឹងកំពុងដំណើរការជួសជុល និងស្ថាបនា នៅតាមដងផ្លូវជាច្រើន ក្នុងមូលដ្ឋានសង្កាត់បឹងទំពន់ទី១ និងទី២ ក្នុងមូលដ្ឋានខណ្ឌមានជ័យ ដើម្បីធានាសំដៅឈានរកទៅការកាត់បន្ថយការលិចលង់ក្នុងម្រិតខ្ពស់ នៅថ្ងៃខាងមុខ ។

សង្កាត់បឹងទំពន់ទី១ និងសង្កាត់បឹងទំពន់ទី២ ជាសង្កាត់២ ក្នុងចំណោមសង្កាត់ទាំង៧ ក្នុងខណ្ឌមានជ័យ ដែលងាយទទួលរងគ្រោះបំផុតដោយការជន់លិច ដោយសារសង្កាត់ទាំង២នេះ ស្ថិតក្នុងសណ្ឋានដីទំនាបទាប បើគិតពីសណ្ឋាននីវូដី ហើយម្យ៉ាង សង្កាត់ទាំង២ ក៏នៅជាប់នឹងមាត់ប្រលាយបង្ហូរទឹកបឹងទំពន់ ដែលជាប្រលាយទទួលរងប្រភពបង្ហូរទឹកពីប៉ែកខាងលើ ដែលជាតំបន់ក្នុងរាជធានីភ្នំពេញផងដែរ ។

លោកសួស សារិន ចៅសង្កាត់បឹងទំពន់ទី១ បានប្រាប់ឱ្យដឹងថា ៖ ក្រោមការដឹកនាំរបស់រាជរដ្ឋាភិបាលនីតិកាលទី៧ បច្ចុប្បន្ននេះ គម្រោងអភិវឌ្ឍន៍អាទិភាពចំនួន៤ ដែលជាគម្រោងថ្នាក់ជាតិ បានកំពុងដំណើរការ ដោយការកាយផ្លូវ និងប្រព័ន្ធលូចាស់ៗចេញ ហើយជំនួសមកវិញ ដោយប្រព័ន្ធលូភ្លោះធំៗមានមុខកាត់រហូតដល់៤ម៉ែត្រ សម្រាប់ជួយរំដោះទឹកនៅរដូវវស្សា រួមជាមួយការស្ថាបនាផ្លូវបេតុងថ្មីក្រាលពីលើផងដែរ សម្រាប់ប្រជាពលរដ្ឋទាំងក្នុង និងក្រៅតំបន់ប្រើប្រាស់ជាប្រយោជន៍រួម ។

លោកបញ្ជាក់ថា ប្រព័ន្ធលូខ្សែ ក្នុងចំណោមគម្រោងអភិវឌ្ឍ៤ខាងលើ គឺជាប្រព័ន្ធលូមេសម្ខាន់មួយ សម្រាប់ការស្រូបទឹក រំដោះទឹកពីតំបន់បឹងទំពន់ ក្នុងភូមិចំរើនផលផ្នែកខាងត្បូង និងសម្រាប់អូសទឹករំដោះទឹកពីតំបន់អតីតទីលានចាក់សម្រាម ដើម្បីអូសទឹកទម្លាក់ទៅប្រលាយបឹងទំពន់ ( ប្រលាយមេ ) រួចបន្តអូសទម្លាក់ទៅស្ថានីយ៍ប៊ូមទឹកបឹងទំពន់តែម្តង ។

លោកចៅសង្កាត់ បានបន្តថា ៖ ក្រៅពីគម្រោងធំៗទាំង៤ខាងលើហើយនោះ នៅថ្ងៃខាងមុខ គម្រោងថ្នាក់ជាតិចំនួន០៣ផ្សេងទៀត ក៏នឹងបន្តឈានទៅអភិវឌ្ឍន៍ជាបន្តបន្ទាប់ដែរ ។ ដែលគម្រោងអភិវឌ្ឍន៍ទាំងអស់នេះ នឹងជួយរំដោះ និងបញ្ចៀសការលិចលង់ ដល់ពលរដ្ឋក្នុងមូលដ្ឋានទាំងមូល នៅថ្ងៃខាងមុខផងដែរ ។

ក្រឡេកទៅមើលសង្កាត់បឹងទំពន់ទី២ឯណោះវិញ លោកអ៊ុម ហ៊ុនឈុនហេង ចៅសង្កាត់ បានប្រាប់ BTV ឱ្យដឹងផងដែរថា ៖ គម្រោងអភិវឌ្ឍថ្នាក់ជាតិ ១គម្រោង ក៏កំពុងដំណើរស្ថាបនាទន្ទឹមគ្នាផងដែរ ដែលជាប្រព័ន្ធរំដោះទឹកមេដ៏ធំក្នុងមូលដ្ឋានរបស់លោក ដែលទទួលទឹកពីភូមិឋានពលរដ្ឋជាច្រើន ចូលទៅក្នុងប្រលាយមេធំ ( ប្រលាយទឹកបឹងទំពន់ ) ។

លោកចៅសង្កាត់បន្ថែមថា គម្រោងនេះ មានប្រវែង១៩២ម៉ែត្រ ដោយនឹងត្រូវកាយលូចាស់ចេញ ហើយដាក់ប្រព័ន្ធលូភ្លោះថ្មី មានមុខកាត់៤ម៉ែត្រ ។ លោកថា នៅពេលដែលគម្រោងនេះ បានអនុវត្តរួច បញ្ហាលិចលង់ក្នុងមូលដ្ឋាន ពិសេសតំបន់ប្រឈមមួយចំនួនដូចជាម្តុំវត្តដំបូកខ្ពស់ នឹងឈានទៅរកការកត់បន្ថយក្នុងកម្រិតខ្ពស់ ។ ក្រៅពីគម្រោងអភិវឌ្ឍន៍ថ្នាក់ជាតិដ៏សម្ខាន់ ក៏មានគម្រោងអភិវឌ្ឍន៍០៣ផ្សេងទៀត កំពុងដំណើរការដូចគ្នា ដែលជាគម្រោងមូលនិធិរបស់សង្កាត់ ។

បងប្អូនប្រជាពលរដ្ឋ រស់នៅក្នុងសង្កាត់ទាំង២ខាងលើនេះ បានបង្ហាញអារម្មណ៍ដូចៗគ្នា ដោយពួកគាត់មានក្តីសប្បាយរីករាយ នៅពេលរាជរដ្ឋាភិបាល តាមរយះសាលារាជធានីភ្នំពេញ ក៏ដូចជាអាជ្ញាធរតាមមូលដ្ឋាន បានគិតគូរក្នុងការជួសជុលកែលម្អរដងផ្លូវ ពិសេសប្រព័ន្ធលូបង្ហូរទឹក ដែលជាចរន្តទឹកដ៏សម្ខាន់ បញ្ចៀសបានពីការលិចលង់ផ្ទះសម្បែង និងភូមិរបស់ពួកគាត់ទាំងអស់គ្នា ។

ពលរដ្ឋបន្តថា ៖ ពិតណាស់ នៅទីណាដែលមានការអភិវឌ្ឍន៍ ទីនោះប្រាកដជាមានផលប៉ះពាល់ហើយ ដោយប៉ះទាំងទៅលើការធ្វើដំណើរឆ្លងកាត់ទៅមក , ប៉ះពាល់រករបរទទួលទាន ក៏ដូចជាការរស់នៅប្រចាំថ្ងៃផងដែរ ក៏ប៉ុន្តែ ពួកគាត់ទាំងអស់គ្នា ស៊ូអត់ធ្មត់ក្នុងស្ថានភាពលំបាកមួយដ៏ខ្លី តែអាចទទួលបានសម្មិទ្ធិផលថ្មីដែលល្អមួយដែលអាចប្រើប្រាស់បានក្នុងរយះពេលយូរ និងគង់វង្សទៅថ្ងៃអនាគត់វិញ ទើបឫជាក្តីប្រសើរ ៕ លីហេង