ក្នុងជំនួបពិភាក្សារងារជាមួយសម្តេចប្រធានរដ្ឋសភា សមាជិកព្រឹទ្ធសភាជប៉ុន សន្យា​បន្ត​ជួយ​លើការ​ពង្រីកវិស័យសក្កានុពលសំខាន់ៗថែមទៀតដល់កម្ពុជា។

នៅថ្ងៃទី១៥ ខែកក្កដា ឆ្នាំ២០២៤ សម្តេចមហារដ្ឋសភាអធិការធិបតី ឃួន សុដារី ប្រធានរដ្ឋសភា បាន​អញ្ជើញជួបជាមួយ ឯកឧត្តម YAMAGUCHI Natsuo ប្រធានគណបក្ស Komeito និងជា​សមាជិក​ព្រឹទ្ធសភាជប៉ុន ដើម្បីទទួលការស្វាគមន៍នៃការបំពេញទស្សនកិច្ច និងពិភាក្សាការងារ នៅវិមានរដ្ឋសភា។

នាឱកាសនោះ​សម្តេចប្រធានរដ្ឋសភា បានសម្តែងការ​ស្វាគមន៍​យ៉ាង​កក់​ក្តៅ​ចំពោះវ​ត្ត​មាន​របស់​ឯកឧត្តម សមាជិកព្រឹទ្ធសភាជប៉ុន និងគណៈប្រតិភូដែលបានអញ្ជើញមកកាន់រដ្ឋសភា ដែលនេះ​ឆ្លុះ​បញ្ចាំងពីទំនាក់ទំនងស្អិតរមួត និងមិត្តភាពរបស់ប្រទេសទាំងពីរដែលរីកចម្រើនជាលំដាប់ ក្នុង​នាមជាដៃគូយុទ្ធសាស្រ្តគ្រប់ជ្រុងជ្រោយដែលទំនាក់ទំនងប្រទេសទាំងពីរផ្តើមចេញពីការយោគយល់ និងគិតគូរពីផលប្រយោជន៍រួមទៅវិញទៅមក។

សម្តេចប្រធានរដ្ឋសភា បញ្ជាក់ថា ការវិនិយោគរបស់ជប៉ុនពិតជាមានសារៈសំខាន់ ដែល​បង្ហាញ​ពី​ទំនុក​ចិត្តស្ថិរភាពលើប្រព័ន្ធគ្រប់គ្រងរបស់កម្ពុជា ដែលធ្វើឱ្យការ​អនុវត្តលើ​កម្មវិធី​ផ្សេងៗ​មាន​ទំនុក​ចិត្ត​ចូលរួមវិនិយោគបន្ថែមទៀតនៅកម្ពុជា។ សម្តេចប្រធានរដ្ឋសភា បញ្ជាក់ទៀតថា ការវិនិយោគ​របស់​ជប៉ុនបានរួមចំណែកដល់ការផ្ទេរចំណេះដឹង និងលើកម្ពស់សមត្ថភាពដល់ប្រជាពលករ និង​និយោគជិកបម្រើក្នុងក្រុមហ៊ុនទាំងអស់នោះ ដែលកត្តាជំរុញការអភិវឌ្ឍន៍សេដ្ឋកិច្ចរបស់កម្ពុជា។

ជាកា​រ​ឆ្លើយតប ឯកឧត្តមប្រធានគណបក្ស Komeito និងជាសមាជិកព្រឹទ្ធសភាជប៉ុន បានស្ងើចសរសើរពីការអភិវឌ្ឍរីកចម្រើនយ៉ាងឆាប់រហ័ស បន្ទាប់​ពីឯកឧត្តម​ធ្លាប់​បាន​អញ្ជើញ​មក​កម្ពុ​ជាក្នុងទសវត្សរ៍៩០ និងកាលពីឆ្នាំ២០០៦ ដែលនៅពេល​នោះ​ឯកឧត្តម​បានចូលរួម​លើ​កិច្ចការ​រ​បស់សម្អាតមីន និងសកម្មភាពមនុស្សធម៌នានានៅកម្ពុជា។ តាមរយៈបន្ទាប់ពីចុះពិនិត្យសារមន្ទីរមីនជាមួយមជ្ឈមណ្ឌលសកម្មភាពកំចាត់មីនកម្ពុជាកាលពីថ្មីៗនេះ ឯកឧត្តមនឹងបន្តការគាំទ្រជួយលើសកម្មភាពបោសសម្អាតមីន ដើម្បី​សម្រេច​គោលដៅ​កម្ពុជា​គ្មានមីននៅឆ្នាំ២០៣០។

ឯកឧត្តម បានបញ្ជាក់ថា ក្នុងនាមសមាជិកព្រឹទ្ធសភាជប៉ុន នឹងចូលរួម​ពង្រឹង​ទំនាក់​ទំនង​ជាមួយ​កម្ពុជា ដោយទំនាក់ទំនងដែលត្រូវពង្រឹងចាប់ពីថ្នាក់ដឹកនាំរវាងប្រទេសទាំងពីរ ព្រមទាំង​កម្រិត​ថ្នាក់​ដឹកនាំ​រដ្ឋសភា ថ្នាក់ដឹកនាំគណបក្ស និងរវាងប្រជាជននៃប្រទេសទាំងផងដែរ។

ក្នុង​ជំនួបនោះដែរ ភាគីទាំងពីរ បញ្ជាក់ថា​ទំនាក់​ទំនង​ប្រទេស​ទាំង​ពីរ​មាន​ទំនាក់​ទំនង​គ្នា​យូរ​អង្វែង​ ត្រូវតែបន្តពង្រឹងបន្ថែមទៀត ដើម្បីសម្រេច​បាន​នូវ​មិត្ត​ភាព​មួយ​ពង្រីក​លើគ្រ​ប់​វិស័យ​រួម​មាន វិស័យសេដ្ឋកិច្ច សន្តិសុខ បរិស្ថាន ការប្រែប្រួលអាកាសធាតុ ដែលយកប្រជាជនជាស្នូល ព្រោះ​កិច្ចសហប្រតិបត្តិការនេះនិងចូលរួមចំណែកដល់ការអភិវឌ្ឍន៍នៃប្រទេសទាំងពីរ ព្រមទាំង​ចូល​រួម​ចម្រៀងដល់សន្តិភាព និងបញ្ហាតំបន់ក្នុងសាកល និងពិភពលោក៕ អត្ថបទ សេក ឧត្តម