នាយករដ្ឋមន្ត្រីឥណ្ឌា លោក Narendra Modi និយាយថា ចំនួនអ្នកតាមដានរបស់លោក នៅលើបណ្តាញផ្សព្វផ្សាយសង្គម X ដែលគេស្គាល់កាលពីពេលមុនថា Twitter បានកើនឡើងដល់១០០ លាននាក់។ ប្រទេសឥណ្ឌា គឺជាប្រទេសមានប្រជាជនច្រើនបំផុតនៅលើពិភពលោក មានប្រជាជនជាង១,៤ ពាន់លាននាក់។

លោក Modi បានធ្វើសេចក្តីប្រកាសកាលពីថ្ងៃអាទិត្យនៅលើបណ្តាញ X ដោយនិយាយថា «រីករាយដែលបានស្ថិតនៅលើមធ្យោបាយដ៏រស់រវើកនេះ»។ លោកក៏បានសរសេរថាលោកនឹង «ពេញចិត្តការពិភាក្សា ការជជែកដេញដោល ការយល់ដឹង ការជូនពរជ័យរបស់ប្រជាជន ការរិះគន់ក្នុងន័យស្ថាបនា និងអ្វីៗជាច្រើនទៀត។

ប្រព័ន្ធផ្សព្វផ្សាយក្នុងស្រុក បានរាយការណ៍ថាចំនួននេះគឺច្រើនជាងពីរដងនៃអ្នកគាំទ្ររបស់ប្រធានាធិបតីសហរដ្ឋអាមេរិក លោក Joe Biden ដែលមាន ៣៨,១ លាននាក់ ។ របាយការណ៍ ក៏បាននិយាយដែរថា នាយករដ្ឋមន្ត្រីឥណ្ឌា បានក្លាយជាមេដឹកនាំ ដែលមានអ្នកតាមដានច្រើនបំផុតនៅលើពិភពលោក។

លោក Modi ដែលបានចាប់ផ្តើមអាណត្តិទី៣ របស់លោក បន្ទាប់ពីការបោះឆ្នោតសកលនៅឆ្នាំនេះ ត្រូវបានគេស្គាល់សម្រាប់ការផ្សព្វផ្សាយព័ត៌មានយ៉ាងសកម្ម តាមរយៈប្រព័ន្ធផ្សព្វផ្សាយសង្គម។

លោកកំពុងបង្ហោះពីសកម្មភាព គោលនយោបាយ និងប្រតិកម្មរបស់លោកចំពោះព្រឹត្តិការណ៍ក្នុងប្រទេស និងក្រៅប្រទេស ជាភាសាអង់គ្លេស ហិណ្ឌូ និងភាសាផ្សេងៗទៀត។

ប្រព័ន្ធផ្សព្វផ្សាយក្នុងស្រុកនិយាយថា មនុស្សមួយចំនួន រិះគន់មេដឹកនាំឥណ្ឌាថា កម្រនឹងធ្វើសន្និសីទសារព័ត៌មានដែលពាក់ព័ន្ធនឹងវគ្គសំណួរ-ចម្លើយ។ ប៉ុន្តែ លោក Modi បានបញ្ជាក់ថា មានឧបករណ៍ទំនាក់ទំនងថ្មីៗជាច្រើនប្រភេទ។