បន្ទាប់ពីរដូវរងាដែលមានអាកាសធាតុក្តៅបំផុតរបស់ប្រទេសក្រិក និងរលកកម្ដៅមកដល់លឿនបំផុតក្នុងកំណត់ត្រា ក្រុមអាជ្ញាធរកំពុងប្រកាសអាសន្នអំពីហានិភ័យនៃកង្វះខាតទឹកធ្ងន់ធ្ងរក្នុងរដូវក្តៅនៅប្រទេសសមុទ្រមេឌីទែរ៉ាណេមួយនេះ។

សេចក្តីប្រកាសពីសេវាសាធារណៈមួយនៅទីក្រុងអាថែន បានសរសេរថា «បើចង់មានទឹកប្រើបន្តទៀត សូមជួយសន្សំសំចៃទាំងអស់គ្នា» ដែលជាសារដាស់តឿនប្រចាំថ្ងៃមួយទៀតដល់អ្នកស្រុកក្នុងរដ្ឋធានីនេះឱ្យប្រើប្រាស់ទឹកដោយសន្សំសំចៃ និងទម្លាប់ខ្ចះខ្ចាយទឹកត្រូវតែផ្លាស់ប្តូរ។

នៅដើមខែកក្កដា កម្រិតទឹកនៅអាងស្តុកទឹក ម័រណូស (Mornos) ចម្ងាយប្រហែល ២០០ គីឡូម៉ែត្រភាគខាងលិចទីក្រុងអាថែន ដែលជាប្រភពទឹកសំខាន់សម្រាប់តំបន់ អាទីកា (Attica) ជុំវិញរដ្ឋធានី បានធ្លាក់ចុះ ៣០ ភាគរយធៀបនឹងរយៈពេលដូចគ្នាក្នុងឆ្នាំ២០២៣។ ហើយប្រភពទឹកបម្រុងសរុបសម្រាប់តំបន់ អាទីកា បានធ្លាក់ចុះជិតមួយភាគបួនក្នុងរយៈពេលដូចគ្នានេះ នេះបើយោងតាមក្រុមហ៊ុនទឹកស្អាត EYDAP។

ដោយជាជម្រករបស់អ្នកស្រុកជាងមួយភាគបីនៃចំនួនប្រជាជនក្រិកសរុប តំបន់ដែលមានអ្នករស់នៅ ៣,៧លាននាក់នេះ ត្រូវបានដាក់ក្នុង «ការជូនដំណឹងពណ៌លឿង» ពីក្រុមហ៊ុនទឹកស្អាត EYDAP ដែលបានជំរុញឱ្យប្រជាជនកាត់បន្ថយការប្រើប្រាស់ទឹកដើម្បីរក្សាប្រភពបំរុងនៅត្រឹមកម្រិតប្រកបដោយនិរន្តរភាព៕