ក្រុមមន្ត្រីបាននិយាយកាលពីថ្ងៃចន្ទ (១៥ កក្កដា) ថាខ្យល់បោកបក់ខ្លាំង និងផ្គររន្ទះនៅចុងសប្តាហ៍បានជំរុញកំណើនចំហេះព្រៃនៅតំបន់ភាគខាងត្បូងរដ្ឋ កាលីហ្វ័រនីញ៉ា (California) ដោយបំផ្លាញផ្ទៃដីរហូតដល់ជាង ១២.០០០ ហិកតាគិតត្រឹមថ្ងៃចន្ទ ហើយបានបង្ខំមនុស្សជាង ១.០០០ នាក់ឱ្យជម្លៀសចេញពីលំនៅឋានរបស់ពួកគេ។

ក្រុមមន្ត្រីបាននិយាយនៅក្នុងសេចក្តីថ្លែងការណ៍មួយថា ចំហេះជាច្រើនដែលបានផ្ទុះឡើងនៅក្នុងតំបន់ ឃើន (Kern) និង សានលូអ៊ីស អូប៊ីសប៉ូ (San Luis Obispo) កាលពីថ្ងៃសៅរ៍ បណ្ដាលមកពីលក្ខខណ្ឌអាកាសធាតុធ្ងន់ធ្ងរ និងរន្ទះស្ងួតកាលពីចុងសប្តាហ៍។

ការិយាល័យសេវាអាកាសធាតុជាតិនៃទីក្រុង ឡូសអែនជើឡេស (Los Angeles) បានព្រមានថា រលកកម្ដៅដែលកំពុងឆាបឆេះនៅភាគខាងលិចនៃសហរដ្ឋអាមេរិក នឹងបង្កើនហានិភ័យនៃចំហេះព្រៃ។

ចំហេះមួយកន្លែងបានចាប់ផ្តើមកាលពីថ្ងៃសៅរ៍ នៅក្នុងតំបន់ ថេចន រ៉ាច (Tejon Ranch) ដែលជាទ្រព្យសម្បត្តិឯកជនដ៏ល្បីមួយមានទំហំជាង ១០ ម៉ឺនហិចតានៅក្នុងតំបន់ Kern ហើយគិតត្រឹមល្ងាចថ្ងៃចន្ទ ចំនួន ៦៥ភាគរយនៃចំហេះត្រូវបានគ្រប់គ្រង បន្ទាប់ពីបានឆេះអស់ប្រហែល ៤ពាន់ហិចតា នេះបើយោងតាមមន្ត្រី និងអង្គភាពពន្លត់អគ្គិភ័យ កាលីហ្វ័រនីញ៉ា (Cal Fire)។

នាយកដ្ឋានអគ្គិភ័យតំបន់ Kern បាននិយាយថា ចំហេះនោះបានបង្ខំឱ្យមានការជម្លៀសមនុស្សជាង ១.០០០ នាក់ពីសហគមន៍ ស្តេលាន ស្ព្រីងស៍ (Stallion Springs) និង Bear Valley Springs នៅក្បែរនោះ៕