នៅក្នុងសុន្ទរកថា នៅម៉ោងដ៏សំខាន់មួយ កាលពីយប់ថ្ងៃអាទិត្យ ប្រធានាធិបតីសហរដ្ឋអាមេរិក លោក ចូ បៃដិន បាននិយាយថា វោហាស័ព្ទនយោបាយ នៅក្នុងប្រទេសនេះ បានឡើងកម្តៅខ្លាំង ហើយ «ដល់ពេលដែលធ្វើឲ្យវា ថយចុះវិញហើយ»។

លោក បៃដិន បានធ្វើការអត្ថាធិប្បាយពីការិយាល័យរាងពងក្រពើនៅសេតវិមាន បន្ទាប់ពីការប៉ុនប៉ងធ្វើឃាតលោកអតីតប្រធានាធិបតី ដូណាល់ ត្រាំ ( Donald Trump) កាលពីថ្ងៃសៅរ៍ នៅឯការជួបជុំមួយក្នុងទីក្រុង Butler រដ្ឋ Pennsylvania ដែលបានបណ្តាលឲ្យអ្នកទស្សនាម្នាក់ស្លាប់ និងពីរនាក់ផ្សេងទៀត រងរបួសយ៉ាងធ្ងន់ធ្ងរ។

លោក បាននិយាយថា៖«មិនមានកន្លែងណាមួយនៅក្នុងសហរដ្ឋអាមេរិកសម្រាប់អំពើហិង្សាបែបនេះទេ សម្រាប់អំពើហិង្សាណាមួយ... យើងមិនអាចអនុញ្ញាតឲ្យអំពើហិង្សានេះ មានលក្ខណៈធម្មតាទេ»។

ដោយកត់សំគាល់ថា ហានិភ័យនៅក្នុងការបោះឆ្នោតនេះ គឺ«មានកម្រិតខ្ពស់យ៉ាងសម្បើមណាស់» លោក បៃដិន បានបញ្ជាក់ថា៖«យើងមិនត្រូវធ្លាក់ចូលទៅក្នុងអំពើហិង្សាបែបនេះទេ» ទោះបីជា«ការផ្តន្ទាទោសរបស់យើង មានលក្ខណៈខ្លាំងក្លាយ៉ាងណាក៏ដោយ»។

នៅក្នុងការអត្ថាធិប្បាយខ្លីមួយ នៅពេលព្រឹកនោះ លោក បៃដិន បាននិយាយថា ការិយាល័យស៊ើបអង្កេតសហព័ន្ធ (FBI) កំពុងដឹកនាំការស៊ើបអង្កេតការបាញ់ប្រហារនេះ ដែលនៅតែស្ថិតក្នុងដំណាក់កាលដំបូងនៅឡើយ។