ទីភ្នាក់ងារព័ត៌មាននិស្សិតអ៊ីរ៉ង់ (ISNA) បានរាយការណ៍ថា ស្ថានទូតអាស៊ែរបៃហ្សង់ក្នុងរដ្ឋធានីតេអេរ៉ង់របស់អ៊ីរ៉ង់ បានដំណើរការឡើងវិញកាលពីថ្ងៃចន្ទ បន្ទាប់ពីបានបិទរយៈពេលជិតមួយឆ្នាំកន្លះ។

យោងតាមសារព័ត៌មានISNA ការបើកស្ថានទូតឡើងវិញដែលត្រូវបានផ្ទេរទៅទីតាំងថ្មី នៅទីក្រុងតេអេរ៉ង់បានធ្វើឡើង បន្ទាប់ពីការចរចាររវាងអ៊ីរ៉ង់ និងអាស៊របៃហ្សង់ ក្នុងរយៈពេលប៉ុន្មានខែ កន្លងទៅនេះ។

ប្រទេសអាស៊ែរបៃហ្សង់ បានសម្រេចចិត្តបិទស្ថានទូតរបស់ខ្លួន នៅក្នុងប្រទេសអ៊ីរ៉ង់ បន្ទាប់ពីមានការវាយប្រហារដោយប្រដាប់អាវុធលើបេសកកម្មការទូត កាលពីថ្ងៃទី២៧ ខែមករា ឆ្នាំ ២០២៣ ដែលបានសម្លាប់បុគ្គលិកម្នាក់ និងរបួសពីរនាក់ផ្សេងទៀត។

នៅក្នុងសេចក្តីថ្លែងការណ៍មួយដែលបានចេញផ្សាយនៅលើគេហទំព័ររបស់ខ្លួន ក្រសួងការបរទេសអាស៊ែរបៃហ្សង់ ក៏បានបញ្ជាក់ពីការបើកស្ថានទូតឡើងវិញ ដោយនិយាយថា៖«បុគ្គលិកការទូត បានត្រឡប់ទៅប្រទេសអ៊ីរ៉ង់វិញហើយ»។

សេចក្តីថ្លែងការណ៍នេះ បាននិយាយថា ការបើកឡើងវិញនេះ គឺបន្ទាប់ពី«អ៊ីរ៉ង់ បានចាត់វិធានការសមស្រប» ដើម្បីធានាសន្តិសុខ នៅមុខស្ថានទូតថ្មីនេះ។