អ្នកនាំពាក្យបាននិយាយថា រដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken) បានប្រាប់ប្រមុខមន្ត្រីអ៊ីស្រាអែលពីររូបកាលពីថ្ងៃចន្ទ (១៥ កក្កដា) អំពី «កម្រិតខ្ពស់ខ្លាំងមិនអាចទទួលយកបាន» លើតួលេខអ្នកស្លាប់ជនស៊ីវិលនៅក្នុងការទម្លាក់គ្រាប់បែករបស់អ៊ីស្រាអែល លើតំបន់ហ្កាហ្សាស្ទ្រីប។

យោធាអ៊ីស្រាអែល បានបើកការវាយប្រហារដ៏ខ្លាំងក្លាជាច្រើនក្នុងប៉ុន្មានថ្ងៃថ្មីៗនេះ រួមមានលើជំរំជនភៀសខ្លួន និងសាលារៀនដែលគ្រប់គ្រងដោយអង្គការសហប្រជាជាតិ ដែលភាគច្រើនជាទីតាំងជ្រកកោនរបស់ជនស៊ីវិល។

ជាការឆ្លើយតប ក្រុមហាម៉ាសបាននិយាយថា ខ្លួនកំពុងដកខ្លួនចេញពីការចរចាបទឈប់បាញ់ ដែលធ្វើឱ្យក្ដីសង្ឈឹមសម្រាប់បទឈប់បាញ់ និងកិច្ចព្រមព្រៀងដោះលែងចំណាប់ខ្មាំងធ្លាក់ចុះបន្ថែមទៀត។

អ្នកនាំពាក្យក្រសួងការបរទេស លោក ម៉ាស៊ូ មីលឡឺ (Matthew Miller) បានប្រាប់អ្នកយកព័ត៌មានថា តួលេខជនរងគ្រោះ «នៅតែខ្ពស់ខ្លាំងមិនអាចទទួលយកបានទេ»។ យើងបន្តមើលឃើញជនស៊ីវិលច្រើនពេកហើយដែលត្រូវបានសម្លាប់នៅក្នុងជម្លោះនេះ។ លោកបន្ថែមថា ការពិភាក្សាទ្វេភាគីរវាងអាមេរិក និងអ៊ីស្រាអែលនោះក៏បានផ្តោតលើបទឈប់បាញ់គ្នារវាងភាគីជម្លោះ ជំនួយមនុស្សធម៌សម្រាប់តំបន់ហ្កាហ្សា និងផែនការក្រោយសង្គ្រាម។

សហរដ្ឋអាមេរិក បានការពារអ៊ីស្រាអែលយ៉ាងខ្លាំងចាប់តាំងពីការវាយប្រហារថ្ងៃទី០៧ ខែតុលា ដោយក្រុមហាម៉ាស ដោយក្នុងនោះមនុស្សជិត ១.២០០នាក់ ដែលភាគច្រើនជាជនស៊ីវិល ត្រូវបានសម្លាប់នេះបើយោងតាមតួលេខរបស់អ៊ីស្រាអែល។ ការវាយលុកសងសឹកពីយោធាអ៊ីស្រាអែល បានសម្លាប់មនុស្សជាង ៣៨.០០០នាក់ ដែលភាគច្រើនក៏ជាជនស៊ីវិលផងដែរ នេះបើយោងតាមទិន្នន័យដែលផ្តល់ដោយក្រសួងសុខាភិបាលហ្កាហ្សា៕