តាមរយៈគម្រោងCAPFish-Capture បានជួយឱ្យសហគ្រាស វង្ស តារា ស្ថិតខេត្តកោះកុង​អាច​នាំ​ចូល​គ្រំចំពុះទាចូលក្នុងផ្សារទំនើប។

លោក វង្ស តារា ម្ចាស់សហគ្រាសកែច្នៃបង្គាក្រៀម និងគ្រំចំពុះទា ស្ថិតនៅខេត្តកោះកុង នៅ​រសៀល​ថ្ងៃទី១៦ ខែកក្កដា ឆ្នាំ២០២៤ បានប្រាប់ក្រុមអ្នកសារព័ត៌មានថា តាមរយៈគម្រោង CAPFish-Capture បានជួយឱ្យសហគ្រាស​របស់លោក​ទទួ​ល​បាន​សមិទ្ធផល​ជា​ច្រើន​ដែល​ក្នុង​នោះ​រួមមាន៖ ទទួលបានវិញ្ញាបនបត្រ CQS Basic ,បង្កើនបរិមាណលក់​បាន​៣១​ភាគរយ​, ទាក់​ទាញ​បាន​អ្នក​ទិញថ្មីចំនួន៥ និងបាននាំគ្រំចំពុះទាចូលក្នុងផ្សារទំនើបម៉ាក្រូជាដើម។ ការឱ្យ​ដឹង​នេះ បានធ្វើឡើងក្នុងឱកាស មន្រ្តីក្រសួងកសិកម្ម រុក្ខាប្រមាញ់ និងនេសាទ រដ្ឋបាលជលផល តំណាង​សហភាពអឺរុបប្រចាំកម្ពុជា អង្គការ UNIDO និងអ្នកសារព័ត៌មានផ្សេងៗចំនួន ២១ស្ថាប័ន ចុះទស្សន​កិច្ច​នៅសហគ្រាសរបស់ វង្ស តារា។

នៅក្នុងបទសម្ភាជាមួយអ្នកសារព័ត៌មានលោកបានបន្តថា សហគ្រាសរបស់លោក បានបង្កើត​ឡើង​នៅ​ឆ្នាំ១៩៩៤ ដែលជាលក្ខណៈគ្រួសារកែច្នៃផលិតផលជលផលសមុទ្រដូចជា៖ គ្រំចំពុះ​ទា​ស្រល់ និងក្រៀម បង្គាក្រៀម និងកាពិ។ សហគ្រាស​ក៏​ជាសមាជិក​សហគមន៍​តំបន់​ការ​ពារ​ទេស​ភាព​ ដែលមានសមាជិកសរុបចំនួន៥២គ្រួសារ ក្រោមការ​គ្រប់គ្រង​របស់​មន្ទីរ​បរិស្ថាន​ខេត្ត​កោះកុង។ លើសពីនេះ លោកបានបង្ហាញ​បំណងចង់​ពង្រីក​ការ​នាំគ្រំចំពុះទា​ទៅ​ទីផ្សារ​បរទេស​ផង​ដែរ​។

លោកស្រី អែម សុធារ៉ា អនុប្រធានទទួលបន្ទុករួមនៃមន្ទីរកសិកម្មខេត្តកោះកុង ឱ្យបានដឹងថា នៅខេត្ត​កោះកុងមានស្រុកមណ្ឌលសីមា និងស្រុកកោះកុង ដែលមាន​ប្រជាពលរដ្ឋ​ជិត​២​រយ​គ្រួសារ បានប្រកបរបចិញ្ចឹមគ្រំចំពុះទាតាមបែបធម្មជាតិ។ លោកស្រីបន្តថា កន្លងទៅមន្ទីរកសិកម្ម រដ្ឋបាលជលផលខេត្តកោះកុង បានសហការជាមួយអង្គការUNIDO ដើម្បីជួយជំ​រុញ​ផលិត​ផលគ្រំចំពុះ​ទា​ឱ្យមានទីផ្សារកាន់តែទូលំទូលាយ និងជួយឱ្យប្រជាសហគមន៍មានការងារធ្វើ។

កម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន ឫហៅថា CAPFISH គឺ​ជា​កម្ម​វិធីជលផលទទួលបានការគាំទ្រឧបត្ថម្ភថវិកាពីសហគមន៍អឺរ៉ុប ក្នុងគោលបំណង​រួម​ចំណែក​លើ​ការ​សម្រេចនូវចក្ខុវិស័យរយៈពេលវែងរបស់រាជរដ្ឋាភិបាលកម្ពុជាក្នុងការអភិវឌ្ឍសង្គម និង​សេដ្ឋកិច្ច សន្តិសុខស្បៀង និងកាត់បន្ថយភាពក្រីក្រ៕ អត្ថបទ៖ទូច សោភ័ណ