ភ្នំពេញ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង​ជា​ប្រធាន​គណៈកម្មាធិការជាតិសុវត្ថិភាពចរាចរណ៍ផ្លូវគោក ថ្លែងថា ការរៀបចំ​កែសម្រួល​សេចក្តី​ព្រាង​ច្បាប់​ស្តីពីចរាចរណ៍ផ្លូវគោកថ្មី ដើម្បីឱ្យស្របតាមស្ថានភាពជាក់ស្តែង នៃការរីកចម្រើន​របស់​ប្រទេស​កម្ពុជា និងចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោក ឱ្យមកនៅ​កម្រិត​ទាប​បំផុត​ និងចូលរួមអនុវត្តនូវផែនការសកលស្តីពីសុវត្ថិភាពចរាចរណ៍ របស់អង្គការសហប្រជាជាតិ ក្នុង​ការ​កាត់បន្ថយចំនួនអ្នកស្លាប់ និងអ្នករបួសដោយសារគ្រោះថ្នាក់ចរាចរណ៍ផ្លូវគោកឱ្យបាន ៥០​ភាគរយ នៅឆ្នាំ២០៣០។

ការថ្លែងបែបនេះ ក្នុងឱកាសឯកឧត្តមអភិសន្តិបណ្ឌិត ដឹកនាំកិច្ចប្រជុំ​ឆ្លង​សេចក្តី​ព្រាង​ច្បាប់​ស្តីពី​ចរាចរណ៍​ផ្លូវ​គោកថ្មី កាលរសៀលថ្ងៃទី១៦ ខែកក្កដា ឆ្នាំ២០២៤ និងមានការចូលរួមពីឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធាន​អចិន្ត្រៃយ៍​គណៈកម្មការ​ជាតិសុវត្ថិភាពចរាចរណ៍ផ្លូវគោក ព្រមទាំងថ្នាក់ដឹកនាំ និងមន្ត្រីពាក់ព័ន្ធ​មួយ​ចំនួន​ទៀត​។

ឯកឧត្តម​ឧបនាយករដ្ឋមន្ត្រី មានប្រសាសន៍ថា សេចក្តីព្រាងច្បាប់ស្តីពី ចរាចរណ៍ផ្លូវគោកថ្មីនេះ ត្រូវ​បានបន្ថែមថ្មី និងកែសម្រួលចំនួន ៥២មាត្រា លើ៩២មាត្រា ដែលក្នុងនោះ ផ្តើម​ស្នើ​ដោយ​ក្រសួង​សាធារណការ និងដឹកជញ្ជូនចំនួន ៤០មាត្រា ផ្តើមស្នើដោយក្រសួងមហាផ្ទៃ ចំនួន ៥មាត្រា និងផ្តើមស្នើដោយក្រសួងមហាផ្ទៃ និងក្រសួងយុត្តិធម៌ ចំនួន ៧មាត្រា។

ជាមួយនេះ​ឯកឧត្តមអភិសន្តិបណ្ឌិត ស សុខា បានស្នើក្រុម​ការងារ​របស់​គណៈកម្មាធិការ​ជាតិ​សុវត្ថិភាព​ចរាចរណ៍ផ្លូវគោក បន្តធ្វើការយ៉ាងជិតស្និទ្ធជាមួយក្រុមការងារ នៃទីស្តីការគណៈរដ្ឋមន្រ្តី ដើម្បី​បន្តឆ្លងក្រុមការងារបច្ចេកទេស តាមនីតិវិធី ឱ្យបានឆាប់រហ័ស និងឈាន​ដល់​ការ​ស្នើ​សុំ​ដាក់​ជូន​ឆ្លង​កិច្ច​ប្រជុំពេញអង្គគណៈរដ្ឋមន្រ្តី ដើម្បីទប់ស្កាត់ និងកាត់បន្ថយគ្រោះថ្នាក់​ចរាចរណ៍​ផ្លូវគោក។

គួរបញ្ជាក់ថា ក្នុងឆមាសទី១ ឆ្នាំ២០២៤នេះ ករណីគ្រោះថ្នាក់ចរាចរណ៍ បានកើតឡើង ១ ៥២០​លើក ក្នុងនោះចំនួនអ្នកស្លាប់ចំនួន ៧៩៣នាក់ កើនឡើង ៣៧នាក់ ស្មើនឹង ៥ភាគរយ ចំនួន​អ្នក​របួស​ជាង ២ពាន់នាក់ កើនឡើង៤៤នាក់ ស្មើនឹង ២ភាគរយ ដែលបានបន្សល់​ទុក​នូវ​សោកនាដ​កម្ម និងបន្ទុកជាច្រើនដល់ប្រជាពលរដ្ឋ និងសង្គម ។ ក្នុងចំណោមអ្នកស្លាប់សរុបមាន ៧៥​ភាគរយ​ ជាអ្នកជិះម៉ូតូ ខណៈចំនួនយានយន្តបានចុះបញ្ជី គិតមកដល់ខែកុម្ភៈ ឆ្នាំ២០២៤ សរុប​ចំនួន ៧ ៣៥១ ៩០៦គ្រឿង ក្នុងនោះម៉ូតូ ចំនួន ៦ ២៤៤ ០៩៦គ្រឿង៕ អត្ថបទ បាន សុខរិទ្ធិ