សាសនិកកាតូលិកនៅកម្ពុជា បានអំពាវនាវដល់បងប្អូនសាសនិកនានានៅកម្ពុជា រួមគ្នា​ចូល​រួម​គាំទ្រ​គម្រោងព្រែកជីកហ្វូណនតេជោ ដែលជាគម្រោងដែល​មាន​សក្កានុពល​យ៉ាង​ច្រើន​ដល់​សង្គមជាតិ។

ស្របពេលពិធីបើកការដ្ឋានគម្រោងព្រែកជីកហ្វូណនតេជោនៅសល់រយៈពេលតែ១៨ថ្ងៃទៀតប៉ុណ្ណោះ និងយោងតាមការអំពាវនាវរបស់ប្រមុខរាជរដ្ឋាភិបាលសម្តេចមហាបវរធិបតី ហ៊ុន ម៉ាណែត ព្រមទាំងសេចក្តីណែនាំរបស់ក្រសួងធម្មការ និងសាសនា ទៅកាន់​គ្រប់​សាសនា​ឱ្យ​ចូល​រួម​​ដល់​គាំទ្រគម្រោងព្រែកជីកហ្វូណនតេជោនោះ លោក គង់ វៀល ជនជាតិបារាំង និង​ជា​សាសនិក​សាសនាកាតូលិកនៅកម្ពុជា បានប្រាប់ឱ្យដឹងនៅថ្ងៃទី១៨ ខែកក្កដា ឆ្នាំ២០២៤ថា ក្នុង​នាម​រូប​លោកជាសាសនិកគ្រិស្តនៅកម្ពុជា បានបង្ហាញ​ការ​រីករាយ​ជាមួយ​ប្រជាជន​កម្ពុជា​ដែល​នា​ពេលឆាប់​ៗ​ខាងមុខនឹងចាប់ផ្តើមបើកការដ្ឋានគម្រោងព្រែកជីកហ្វូណនតេជោ។

សាសនិកកាតូលិកជនជាតិបារាំងរូបនេះ បញ្ជាក់ថា គម្រោងនេះពិត​ជា​មាន​សារៈ​សំខាន់​សម្រាប់​កម្ពុជា​ទាំង​សេដ្ឋកិច្ច សង្គម វប្បធម៌ នឹងកាន់តែមានឯករាជ្យភាព និងការអភិវឌ្ឍន៍ជាងនេះ។ សាស​និកកាតូលិកជនជាតិបារាំងរូបនេះ បានអំពាវនាវ​ដល់​សាសនិក​នៃ​សាស​នានា​នៅ​កម្ពុជា​ទាំង​អស់​ចូលរួមគាំទ្រគម្រោងព្រៃឈីកហ្វូណនតេជោ ដើម្បីឲ្យកម្ពុជាកាន់​តែ​មាន​អនាគត​ល្អ​ប្រសើរ​។

យោងតាមសេចក្តីណែនាំរបស់ក្រសួងធម្មការ និងសាសនា កាលពីដើមខែកក្កដានេះ បាន​ណែនាំ​ដល់​ប្រធានមន្ទីរធម្មការនិងសាសនា រាជធានី-ខេត្តទាំងអស់ ត្រូវសហការជាមួយព្រះមេគណ ព្រះ​អនុគណ ព្រះចៅអធិការ និងមេដឹកនាំគ្រប់សាសនា រៀបចំ វាយគង ជួង រតាំង ទូងស្គរ ទះប៉ោត និង​គោះត្រដោក ដោយបន្លឺជាសំឡេងឱ្យបានកងរំពង នៅតាមទីអារាមសាសនា ដូចជា វត្ត មណ្ឌល​វិបស្សនា អាស្រម សាលាបុណ្យ វិហារសាសនា ស្នាក់ការស៊ូរ៉ាវឱ្យបានព្រមៗគ្នា។ ក្នុងនោះ ត្រូវបង្កលក្ខណៈនៅតាមអារាមសាសនានីមួយៗ ដើម្បីឱ្យបរិស័ទ​ទាំងអស់​បាន​ចូលរួម​អបអរ​សាទរឱ្យបានឱឡារិកអធិកអធម។

សូមជម្រាបថា គម្រោងព្រែកជីកហ្វូណនតេជោ ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីប្រកាសពិធីបើកការដ្ឋាននៅថ្ងៃទី៥ ខែសីហា ឆ្នាំ២០២៤ខាងមុខនេះ។ គម្រោង​នេះ​ត្រូវ​បានមជ្ឈដ្ឋានក្នុង និងក្រៅប្រទេសបន្តគាំទ្រយ៉ាងពេញទំហឹង ដើម្បីឱ្យគម្រោង​នេះ​ក្លាយ​ជា​ផ្លូវ​នាវា​ចរណ៍ និងប្រព័ន្ធភស្ដុភារកម្មទន្លេបាសាក់ ដោយតភ្ជាប់​ផ្លូវ​ទឹក​រវាង​ទន្លេ​ទៅ​កាន់​សមុទ្រ​កម្ពុជា ឆ្លងកាត់ខេត្តកណ្តាល តាកែវ កំពត និងខេត្តកែប និងមានប្រវែង១៨០គីឡូម៉ែត្រ ខណៈ​គម្រោង​គ្រោង​ចំណាយទុនសាងសង់ប្រមាណ ១,៧០០លានដុល្លារអាមេរិក៕ អត្ថបទ៖ សេក ឧត្តម