អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃ​ក្រសួង​ពាណិជ្ជកម្ម នៅថ្ងៃទី១៧ កក្កដា ឆ្នាំ២០២៤នេះ បានសហការជាមួយសាលារៀនអន្តរទ្វីប អាមេរិក​កាំង រៀបចំវគ្គផ្សព្វផ្សាយស្តីពីសុវត្ថិភាពម្ហូបអាហារ និងបទប្បញ្ញត្តិពាក់ព័ន្ធនានា ដល់​សិស្សា​នុសិស្សសរុបចំនួនជាង ២០០នាក់។

នៅក្រោយចប់កម្មវិធីនេះ លោក ហេង មាលី ប្រធានសាខា ក.ប.ប. រាជធានីភ្នំពេញ បាន​មាន​ប្រសាសន៍​ប្រាប់​ព័ត៌មាន ប៊ីធីវី ឲ្យដឹងថា វគ្គផ្សព្វផ្សាយនេះ មានគោលបំណង​ដើម្បី​ឲ្យ​សិស្សានុសិស្ស​យល់​ច្បាស់អំពីលក្ខខណ្ឌ កាតព្វកិច្ច និងសិទ្ធិដែលត្រូវទទួលបាន សំដៅជំរុញ​លើក​កម្ពស់​សុខុមាលភាព និងផលប្រយោជន៍សេដ្ឋកិច្ចរបស់អ្នកប្រើប្រាស់។

លោកបានបន្តថា គោលបំណងសំខាន់មួយថែមទៀត គឺណែនាំឲ្យអ្នក​ចូលរួម​ទាំង​អស់​ទាញ​យក​កម្ម​វិធី CCF Complaint App ទៅក្នុងទូរស័ព្ទ Smart Phone ក្នុងករណីឃើញ​មាន​ផលិត​ផល​ដែល​អាច​ប៉ះពាល់បញ្ហសុខភាពដល់អ្នកទទួលទាន សូមផ្តល់ព័ត៌មាន ឬដាក់ពាក្យបណ្តឹង តាម​អេបមួយនេះ (App) ដើម្បីចាត់វិធានការណ៍តាមច្បាប់។ 

ពាក់ព័ន្ធកិច្ចសហការក្នុងការរៀបចំវគ្គផ្សព្វផ្សាយស្តីពីសុវត្ថិភាពម្ហូបអាហារ និង​បទ​ប្បញ្ញត្តិ​ពាក់​ព័ន្ធ​នានា ខាងលើនេះ លោក ហ៊ិន គឹមហៀក ចាងហ្វាងមធ្យមសិក្សាបឋមភូមិ នៃសាលារៀនអន្តរទ្វីប អាមេរិកកាំង បានឲ្យ ប៊ីធីវី ដឹងថា សាលានឹងបន្តការងារនេះជាមួយ អគ្គនាយកដ្ឋាន ក.ប.ប. បន្ថែម​ទៀត ដើម្បីបញ្រ្ជៀបការយល់ដឹងពីសុវត្ថិភាពម្ហូបអាហារ ទៅកាន់​សិស្សានុសិស្ស​គ្រប់​សាខា​ទាំង​អស់ ដើម្បីឲ្យពួកគាត់បានស្វែងយល់អំពីការជ្រើសរើសម្ហូបអាហារមានគុណភាព សុវត្ថិភាព តាម​លក្ខខណ្ឌតម្រូវជាធរមានលើស្លាកសញ្ញា ដែលបានបង្ហាញជូនក្នុងឯកសារ។

សូមជម្រាបជូនថា នៅក្នុងវគ្គផ្សព្វផ្សាយនេះដែរ ក.ប.ប. ក៏បានចែកជូនផ្ទាំងរូបភាព​អំពី​សុវត្ថិភា​ព​ម្ហូប​អាហារ​ដល់សិស្សានុសិស្ស និងលោកគ្រូ អ្នកគ្រូ ដែលជាការផ្តល់​ចំណេះ​ដឹង​សម្រាប់​អ្នក​ប្រើ​ប្រាស់ បានស្វែងយល់អំពីការជ្រើសរើសម្ហូបអាហារ មានគុណភាព សុវត្ថិភាព តាម​លក្ខ​ខណ្ឌ​តម្រូវ​ជា​ធរមានលើស្លាកសញ្ញា សម្រាប់ផលិតផល ម្ហូបអាហារវេចខ្ចប់ស្រាប់ និងប្រព័ន្ធគ្រប់គ្រង​សុវត្ថិភាព​ម្ហូប​អាហារចាប់ពីកសិដ្ឋាន ដល់តុអាហារ។ ជាមួយនោះ មន្រ្តីជំនាញ ក៏បាន​ផ្សព្វ​ផ្សាយ​ដល់អ្នកចូលរួមទាញយកកម្មវិធី CCF Complaint App ឬទាក់ទងតាមលេខទូរសព្ទ Hotline របស់ក្រសួងពាណិជ្ជកម្ម ដោយឥតគិតថ្លៃ លេខ1266 ដែល​ជា​យន្តការ​ដាក់​ពាក្យ​បណ្តឹង​ពី​អ្នក​​​ប្រើ​ប្រាស់ ទៅកាន់ក្រសួងពាណិជ្ជកម្ម និងអគ្គនាយកដ្ឋាន ក.ប.ប.៕ អត្ថបទ៖ ឈិត បូរ៉ាវី