គណៈកម្មាធិការសង្គ្រោះបន្ទាន់នៅក្រុង Deir al-Balah តំបន់ហ្កាហ្សា បានប្រកាសថា ប្រព័ន្ធបូមទឹកបានឈប់ដំណើរការ ដោយសារតែខ្វះប្រេងឥន្ធនៈ សម្រាប់ដំណើរការម៉ាស៊ីនបូមទឹក។

ប្រព័ន្ធបូមទឹកនេះ ផ្តល់ទឹកដល់អណ្តូងចំនួន ១៩ អណ្តូង និងស៊ីទែនទឹកចំនួន ២ សម្រាប់ផ្គត់ផ្គង់ទឹកដល់ប្រជាជននៅតំបន់នោះ។

លោក Nizar Ayash សមាជិកក្រុមប្រឹក្សាតំបន់ បានប្រាប់សារព័ត៌មានរ៉យទ័រថា បច្ចុប្បន្ននេះចំនួនប្រជាជនក្នុងតំបន់ ត្រូវបានគេប៉ាន់ស្មានថាមានប្រហែល ៨០០.០០០នាក់ ទាំងពលរដ្ឋក្នុងតំបន់និងប្រជាជនភៀសខ្លួន។ លោក Ayash បានពន្យល់ថា ការខ្វះទឹកកំពុងបង្កឱ្យមានការរាលដាលជំងឺ ខណៈលោកបាននិយាយអំពីតម្រូវការទឹកខ្លាំងក្នុងតំបន់ ជាពិសេសក្នុងអំឡុងរដូវក្តៅ ដោយសារសីតុណ្ហភាពហក់ឡើងខ្ពស់។

ប្រជាជនភៀសខ្លួន នៅទីក្រុង Deir al-Balah បច្ចុប្បន្នត្រូវស្វែងរកទឹកស្អាត ឬត្រូវទិញទឹក ដែលពុំមែនជាការងារងាយស្រួលនោះទេ ដោយសារតែសង្គ្រាម និងជីវភាពរស់នៅដ៏លំបាកដែលប្រជាជនត្រូវប្រឈមមុខ។

ការវាយលុកនៅតំបន់ហ្កាហ្សា បានឈានចូលដល់ខែទី ១០ របស់ខ្លួន ខណៈអ៊ីស្រាអែល បានបំផ្លាញភាគច្រើននៅតំបន់ហ្កាហ្សា បន្ទាប់ពីការវាយលុករបស់ក្រុមហាម៉ាស កាលពីថ្ងៃទី៧ ខែតុលា បានសម្លាប់មនុស្សប្រហែល ១.២០០នាក់ ហើយខ្មាន់កាំភ្លើងបានចាប់មនុស្សប្រហែល២៥០ នាក់ ជាចំណាប់ថ្នូរ នេះបើយោងតាមចំនួនសរុបរបស់អ៊ីស្រាអែល។

ទន្ទឹមនឹងនេះ យោងតាមមន្ត្រីសុខាភិបាលតំបន់ហ្កាហ្សា បានឲ្យដឹងថា ពលរដ្ឋប៉ាឡេស្ទីនជាង ៣៨.៧០០នាក់ ត្រូវបានសម្លាប់នៅក្នុងការវាយលុកសងសឹក របស់អ៊ីស្រាអែល។