លោក Guo Wengui ដែលជាពាណិជ្ជករចិនរស់នៅនិរទេសខ្លួន និងជាអ្នកប្រឆាំងឥតសំចៃមាត់លើរដ្ឋាភិបាលទីក្រុងប៉េកាំង កាលពីថ្ងៃអង្គារ (ទី១៦ ខែកក្កដា) ត្រូវបានផ្ដន្ទាទោសក្នុងសវនាការ នៅសហរដ្ឋអាមេរិក ក្រោមការចោទប្រកាន់ពីបទលួចលុយរាប់រយលានដុល្លារ ពីក្រុមអ្នកតាមដានលើប្រព័ន្ធអ៊ីនធឺណិត។

លោក Guo ត្រូវបានកាត់ទោសបទល្មើសព្រហ្មទណ្ឌចំនួន ៩ករណី ក្នុងចំណោម ១២ករណី ដែលលោកត្រូវប្រឈម ក្នុងនោះរួមទាំងករណីឃុបឃិតក្នុងសកម្មភាពជំនួញទុច្ចរិត និងការឆបោកតាមអនឡាញផងដែរ នៅក្នុងការកាត់ក្តី ដែលមានរយៈពេល ៧សប្តាហ៍។ 

រូបលោក អាចប្រឈមនឹងការជាប់ពន្ធនាគាររាប់ទសវត្សរ៍។ ចៅក្រមសហព័ន្ធអាមេរិក លោកស្រី Analisa Torres បានកំណត់ថ្ងៃកាត់ទោសលើរូបលោក នៅថ្ងៃទី១៩ ខែវិច្ឆិកា។

រដ្ឋអាជ្ញាសហព័ន្ធនៅទីក្រុង Manhattan បានប្រាប់ឲ្យដឹងថា លោក Guo បានរៃអង្គាសប្រាក់បានជាង ១ពាន់លានដុល្លារ ដោយធានាចំពោះអ្នកតាមដាននៅលើបណ្ដាញសង្គមថា ពួកគេនឹងមិនបាត់បង់ប្រាក់នោះទេ ប្រសិនបើពួកគេបានចូលរួមជាមួយលោក ក្នុងគម្រោងវិនិយោគ និងរូបិយប័ណ្ណគ្រីបតូ ពីឆ្នាំ២០១៨ ដល់ឆ្នាំ២០២៣ ដោយរូបគេបាននិយាយថា មួយចំនួននៃប្រាក់ទាំងនោះ នឹងត្រូវបានប្រើប្រាស់ ដើម្បីបន្តប្រឆាំងរដ្ឋាភិបាលចិន៕