មេដឹកនាំរបស់ក្រុមហេសបូឡាហ៍ (Hezbollah) គឺលោក Sayyed Hassan Nasrallah នៅថ្ងៃពុធ (ទី១៧ ខែកក្កដា) នេះ បាននិយាយថា ក្រុមហេសបូឡាហ៍ នឹងវាយប្រហារគោលដៅថ្មី ក្នុងប្រទេសអ៊ីស្រាអែល ប្រសិនបើប្រទេសនេះនៅតែបន្តសម្លាប់ជនស៊ីវិល នៅក្នុងប្រទេសលីបង់។

គួរបញ្ជាក់ថា យោងតាមប្រព័ន្ធផ្សព្វផ្សាយរដ្ឋ និងប្រភពសន្តិសុខ បានឲ្យដឹងថា ជនស៊ីវិល ៥នាក់ ជាជនជាតិស៊ីរីទាំងអស់ និងរួមទាំងកុមារ ៣នាក់ផងដែរ បានស្លាប់ដោយសារការវាយប្រហាររបស់អ៊ីស្រាអែល នៅក្នុងប្រទេសលីបង់ កាលពីថ្ងៃអង្គារ (ទី១៦ ខែកក្កដា) ហើយយ៉ាងហោចណាស់ជនស៊ីវិលលីបង់ ៣នាក់ ក៏បានបាត់បង់ជីវិតផងដែរ នៅមួយថ្ងៃមុននោះ។

នៅក្នុងការអត្ថាធិប្បាយដែលបានធ្វើឡើងអំឡុងពេលធ្វើសុន្ទរកថាតាមទូរទស្សន៍ ដើម្បីប្រារព្ធពិធីបុណ្យពិសិដ្ឋ Ashoura របស់អ្នកកាន់សាសនាឥស្លាមនិកាយស៊ីអ៊ីត លោក Nasrallah បាននិយាយថា៖ «ការបន្តកំណត់គោលដៅជនស៊ីវិល នឹងជំរុញឲ្យក្រុមចលនាតស៊ូបាញ់មីស៊ីលដាក់តំបន់តាំងទីលំនៅដែលកាលពីមុនមិនត្រូវបានកំណត់គោលដៅឡើយ»។

អ៊ីស្រាអែល និងក្រុមហេសបូឡាហ៍ បានបាញ់ប្រហារគ្នាទៅវិញទៅមក ចាប់តាំងពីក្រុមហេសបូឡាហ៍បានប្រកាស «រណសិរ្សគាំទ្រ» ដល់ប៉ាឡេស្ទីន ពោលគឺភ្លាមៗ បន្ទាប់ពីសម្ព័ន្ធមិត្តរបស់ក្រុមនេះ គឺក្រុមហាម៉ាស បានវាយប្រហារលើសហគមន៍ព្រំដែនភាគខាងត្បូងអ៊ីស្រាអែល កាលពីថ្ងៃទី៧ ខែតុលា ដែលការវាយប្រហារនោះបានបង្កឲ្យមានការវាយលុកយោធាសងសឹកជាបន្តបន្ទាប់របស់អ៊ីស្រាអែល នៅក្នុងតំបន់ហ្កាហ្សា រហូតមកដល់ពេលនេះ៕