ឧត្តរមានជ័យ៖ បន្ទាប់ពីប្រកាសចូលកាន់មុខតំណែងជាអភិបាលនៃគណៈអភិបាលខេត្តឧត្តរមានជ័យថ្មី ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានបើកកិច្ចប្រជុំគណៈបញ្ជាការឯកភាពខេត្ត លើកដំបូង ដាក់បទបញ្ជាយ៉ាងម៉ឺងម៉ាត់ដល់អង្គភាពជំនាញពាក់ព័ន្ធទាំងអស់ ក្នុងការ​បង្រ្កាប​ទប់ស្កាត់​រាល់បទល្មើសឆ្លងដែននានា និងការងារសន្តិសុខសណ្តាប់ធ្នាប់សង្គម​ក្នុងភូមិសាស្រ្ត​ខេត្តឧត្តរមានជ័យ ឲ្យទទួលបានប្រសិទ្ធភាពខ្ពស់។

ក្នុងកិច្ចប្រជុំគណៈបញ្ជាការឯកភាពខេត្ត នាព្រឹកថ្ងៃទី១៨ខែកក្កដាឆ្នាំ២០២៤ ឯកឧត្តម មាន ចាន់យ៉ាដា បានដាក់នូវបទបញ្ជាយ៉ាងម៉ឺងម៉ាត់ដល់កងកម្លាំងប្រដាប់អាវុធ​ទាំងបី និងមន្ទីរស្ថាប័ន​ពាក់ព័ន្ធទាំងអស់ ត្រូវបង្កើនការយកចិត្តទុកដាក់ឲ្យបានកាន់ប្រសើរឡើងបន្ថែមទៀត ក្នុងការ​អនុវត្ត​ការងារស្នូលរបស់ខ្លួន ឲ្យមានកម្លាភាព និងប្រសិទ្ធភាពខ្ពស់ ដើម្បី​បម្រើ​ជាប្រយោជន៍​ជូនពលរដ្ឋ​ក្នុងសង្គមឲ្យបានកាន់តែល្អ។

ឯកឧត្តម បានបន្តទៀតថា​ ពិសេសនោះ​ការងារ​សន្តិសុខសណ្តាប់ធ្នាប់​សង្គម​ត្រូវ​បង្រ្កាប​ទប់ស្កាត់​ឲ្យ​បាន​ដាច់ខាត​រាល់បទល្មើសឆ្លងដែននានា ដូចជា បញ្ហា​គ្រឿងញៀន ​ក្មេងទំនើង ​ការជួញដូរ​មនុស្សឆ្លងដែន​ ក្នុងដែនសមត្ថកិច្ច​។

យ៉ាងណាម៉ិញ ​ឯកឧត្តមអភិបាលខេត្តឧត្តរមានជ័យ ​បាន​ប្រសាសន៍​ណែនាំ​បន្ថែម​ដល់​គ្រប់​មន្ទីរស្ថាប័ន​អង្គភាព​ពាក់ព័ន្ធ​ជុំវិញ​ខេត្ត និង​កងកម្លាំងទាំងបី​ត្រូវ​សហការ​គ្នាជា​ធ្លុង​មួយ​សាមគ្គីភាព​ផ្ទៃក្នុងឲ្យបានកាន់តែល្អក្នុងការប្រាស្រ័យទាក់ទង ការងារប្រកប​ទៅ​ដោយភាព​រលូនផងដែរ៕