ការព្យាយាមការពារ និងលេងបាល់វែងរបស់ក្រុមម្ចាស់ផ្ទះ Young Elephants បានក្លាយ​ជាការ​គិត​ខុស​របស់លោក Pep Muñoz គ្រូបង្វឹកក្រុមព្រះខ័នរាជស្វាយរៀង ក្នុងការប្រកួតជើងឯកក្លិប​កំពូល​អាស៊ាន ASEAN Club Champion-Shopee Cup វគ្គជម្រុះជើងទី១ កាលពីរាត្រីថ្ងៃ​ពុធ​កន្លង​ទៅ ទោះបីក្រុមខ្លួន បានទទួលជ័យជម្នះ ៣-២ ក៏ដោយ ។

ថ្លែងប្រាប់ក្រុមការងារ BTV-News ក្រោយដឹកនាំក្រុមត្រឡប់មកដល់កម្ពុជាវិញ នៅរសៀល​ថ្ងៃទី​១៨ ខែកក្កដា លោក Pep Muñoz បានគូសបញ្ជាក់ថា ការលេងរបស់ក្រុមម្ចាស់ផ្ទះ ផ្ទុយពី​ការគិត និងរៀបចំទុកមុន ហើយកាន់តែលំបាក នៅពេលអ្នកចាំទី វីរៈ ដារ៉ា ទទួលការ​ពិន័យ​កាត​ក្រហម ។ យ៉ាងណាលោកសប្បាយចិត្ត ដែលក្រុមបានគ្រប់គ្រងហ្គេមជាថ្មី នៅវគ្គទី២ រហូត​អាច​រកគ្រាប់បាល់ជ័យជម្នះ ។ លោកបានចាត់ទុកនេះគឺជាបទពិសោធន៍ និងមេរៀនមួយ ដើម្បីត្រៀម​ការ​ប្រកួតជើងទី២ នាសប្ដាហ៍ក្រោយ ។

សូមបញ្ជាក់ថា ជំនួបជើងទី១ នៃជើងឯកក្លិបបាល់ទាត់ប្រចាំតំបន់ នៅទីក្រុងវៀងចន្ទន៍ កាលពី​ល្ងាច​ថ្ងៃ​ទី១៧ ខែកក្កដា ឆ្នាំ២០២៤ ក្រុមជើងឯកលីគកំពូលកម្ពុជា ព្រះខ័នរាជស្វាយរៀង បាន​យកឈ្នះក្រុមម្ចាស់ផ្ទះ Young Elephants ៣-២ ។ ការប្រកួតដ៏ជក់ចិត្តនេះ Gabriel Silva ជា​អ្នករកគ្រាប់បាល់នាំមុខឲ្យក្រុមភ្ញៀវ ១គ្រាប់មុន នៅនាទី១៩ មុនព្រះខ័នរាជស្វាយរៀង បាត់​បង់​សមាជិកម្នាក់ គឺអ្នកចាំទី វីរៈ ដារ៉ា ដែលរងការពិន័យកាតក្រហម ដែលនាំឲ្យក្រុមម្ចាស់ផ្ទះ មាន​ឱកាស​រក​បាន ២គ្រាប់នាំមុខវិញ មុនបញ្ចប់វគ្គទី១ ។

ប៉ុន្ដែចូលវគ្គទី២ ព្រះខ័នរាជស្វាយរៀង នៅតែបន្ដដាក់សម្ពាធខ្លាំងលើគូប្រជែង ពិសេស​ក្រោយអ្នកចាំទី Solasak Thilavong រងការពិន័យកាតក្រហមបណ្ដេញចេញ ក្រុមតំណាងកម្ពុជា បាន​ព្យាយាមកៀបសង្កត់ រហូតរកបានគ្រាប់តាមស្មើ នៅនាទី៩០ ដែលធ្វើសម្រេចដោយកីឡាករ Christian Dos Santos ក្រោយការបញ្ជូនពីមិត្ដរួមក្រុម ញាណ សុស៊ីដាន ខណៈនៅចុងម៉ោង កីឡាករចំណូលថ្មី ទើបផ្ទេរពីក្លិប Tiffy Army FC ញាណ សុស៊ីដាន បានញាក់ និងស៊ុតពី​ចម្ងាយ​បំប៉ោង​សំណាញ់ទីក្រុម Young Elephants ១គ្រាប់ទៀត ដើម្បីធានាជ័យជម្នះក្នុងជើងទី១ ឲ្យក្រុមព្រះខ័នរាជស្វាយរៀង មុនការប្រកួតជើងទី២ នាថ្ងៃទី២៤ ខែកក្កដាខាងមុខ ៕