ប្រទេសអូស្ត្រាលី បានប្តេជ្ញាកាលពីថ្ងៃពុធថា នឹងឲ្យរុស្ស៊ីទទួលខុសត្រូវចំពោះការបាញ់ធ្លាក់យន្តហោះម៉ាឡេស៊ី MH17 កាលពី ១០ ឆ្នាំមុន ដែលបានបណ្តាលឲ្យមនុស្សជិត ៣០០ នាក់ស្លាប់។

នៅថ្ងៃទី ១៧ ខែកក្កដា ឆ្នាំ ២០១៤ យន្តហោះ Boeing 777 ដែលកំពុងធ្វើដំណើរពីទីក្រុង Amsterdam ទៅកាន់ទីក្រុងគូឡាឡាំពួ (Kuala Lumpur) ត្រូវបានបាញ់ទម្លាក់ដោយមីស៊ីលពីដីទៅលើអាកាស BUK ផលិតដោយប្រទេសរុស្ស៊ី ពីខាងលើភាគខាងកើតអ៊ុយក្រែន។

មនុស្សសរុប ២៩៨នាក់ នៅលើយន្តហោះ បានស្លាប់ ក្នុងនោះមានជនជាតិអូស្ត្រាលី ៣៨នាក់។

រដ្ឋមន្ត្រីការបរទេសលោកស្រី Penny Wong បានប្រាប់សាច់ញាតិ និងឥស្សរជន ដែលបានបាត់បង់ជីវិតនៅឯពិធីរំលឹកវិញ្ញាណក្ខន្ធ នៅសភាក្នុងទីក្រុងកង់បេរ៉ា( Canberra)ថា ប្រទេសអូស្ត្រាលី នឹង «មិនត្រូវបានរារាំងក្នុងការប្តេជ្ញាចិត្តរបស់យើង ក្នុងការឲ្យរុស្ស៊ីទទួលខុសត្រូវទៅលើករណីបាញ់ទម្លាក់យន្តហោះនេះ»។

លោកបានថ្លែងថា៖ «ខ្ញុំសូមប្ដេជ្ញាជាថ្មីនូវការស្វែងរកការពិត យុត្តិធម៌ និងការទទួលខុសត្រូវរួមចំពោះអំពើហិង្សា ដែលបានប្រព្រឹត្ត នៅថ្ងៃទី ១៧ ខែកក្កដា ឆ្នាំ ២០១៤»។

«យើងមិនដែលភ្លេចទុក្ខសោកដ៏ក្រៀមក្រំនេះឡើយ ប៉ុន្តែពេលវេលា និងសេចក្តីស្រឡាញ់ អាចជួយកាត់បន្ថយទម្ងន់នៃទុក្ខសោកបានខ្លះដែរ»។

ឈ្មោះជនជាតិអូស្ត្រាលី ដែលបានស្លាប់ត្រូវបានអាននៅឯពិធីរំលឹក ខណៈដែលសមាជិកគ្រួសារ បានដាក់ផ្កាពណ៌មាស នៅលើកម្រងផ្កា មនុស្សជាច្រើន បានឈប់សម្រាកមួយភ្លែត ឬជូតទឹកភ្នែក ដោយសារការ នឹកដល់មនុស្សដែលជាទីស្រឡាញ់របស់ពួកគេ។