យោងតាមការអះអាងរបស់ក្រុមអ្នកស្រាវជ្រាវ បានឲ្យដឹងថា ឆ្អឹងហ្វូស៊ីលមានស្នាមមុតដែលត្រូវបានរកឃើញនៅក្នុងប្រទេសអាហ្សង់ទីន បង្ហាញពីវត្តមានរបស់មនុស្សនៅតំបន់ភាគខាងត្បូងអាមេរិកឡាទីនមួយនេះ តាំងពីរយៈពេលប្រហែល ២១.០០០ឆ្នាំមុនមកម្ល៉េះ ។

ឆ្អឹងនេះ គឺជាឆ្អឹងរបស់សត្វពង្រូលមាឌធំ ដែលបានរកឃើញកាលពីឆ្នាំ ២០១៥ នៅតំបន់ទីក្រុងរណប Buenos Aires ។

ការសិក្សាលើការរកឃើញនេះ ត្រូវបានចុះផ្សាយកាលពីថ្ងៃពុធម្សិលមិញ ។

លោក Mariano del Papa គឺជាបុរាណវិទូអាហ្សង់ទីន និយាយថា ការវិភាគយ៉ាងល្អិតល្អន់ នាំឲ្យពួកយើងកំណត់ថា នេះគឺជាស្នាមមុត ហើយអ្នកដែលធ្វើឲ្យមានស្នាមមុតនេះ គឺជាមនុស្ស ។

លោកបន្តថា នេះមិនមែនជាស្នាមមុតបង្កឡើងដោយសារការវាយប្រហាររបស់សត្វផ្សេង មិនមែនកណ្តុរ ឬស្នាមខំារបស់សត្វស៊ីសាច់ជាអាហារនោះឡើយ ។

ក្រុមអ្នកស្រាវជ្រាវ និយាយថា ស្នាមមុតនៅលើឆ្អឹង ប្រហែលមកពីមនុស្សប្រើឧបករណ៍ធ្វើពីថ្ម បើទោះបីជាគ្មានហ្វូស៊ីលមនុស្ស ត្រូវបានរកឃើញនៅទីនោះក៏ដោយ ៕