​បាល់ទាត់៖ ​ខ្សែប្រយុទ្ធ​អង់គ្លេស Tammy Abraham រកបាន​គ្រាប់​ដំបូង​នៅ​ក្របខណ្ឌ​អ៊ីតាលី Serie A តាំងពី​ផ្ទេរ​ពី Chelsea ខណៈ AS Roma យកឈ្នះ​នៅ​ទឹកដី Salernitana ៤-០​។ ​គ្រាប់​បាល់​បញ្ចូល​ទី​របស់​កីឡាករ​វ័យ ២៣ឆ្នាំ​រូបនេះ​ត្រូវ​រង់ចាំ​ដល់​នាទី​ទី៦៩ ក្នុងការ​ប្រកួត​ដែលជា​គ្រាប់​នាំមុខ ៣-០ របស់ Roma បន្ទាប់ពី Lorenzo Pellegrini និង Jordan Veretout រកបាន​ម្នាក់​មួយគ្រា​ប់​។

​ក្រោយមក Pellegrini ដដែល​ក៏​រកបាន​គ្រាប់​ទី​ពីរ​របស់ខ្លួន​ និង​គ្រាប់​ចុងក្រោយ​ឱ្យ Roma យកឈ្នះ​នៅ​ទឹកដី Salernitana ៤-០​។ ​សប្តាហ៍​មុន Tammy Abraham ក៏បាន​បង្ហាញខ្លួន​ផងដែរ​ពេល Roma យកឈ្នះ Fiorentina ២-១ ដែល​ពីរ​គ្រាប់​នោះគេ​គឺជា​អ្នក​បញ្ជូន​ទាំងពីរ​។ នេះ​ជា​ជ័យជំនះ​ពីរ​ប្រកួត​ជាប់​គ្នា​ផងដែរ​សំរាប់​រដូវ​កាល​ថ្មី​នេះ​របស់ Roma ដែល​ស្ថិតក្រោម​ការដឹក​នាំ​រប​ស់លោក Jose Mourinho​។

​​ចំណែក AC Milan យប់មិញ​ក៏​រកបាន​បី​ពិន្ទុ​ដែរ​ដោយ​បំបាក់ Cagliari ៤-១ ដោយ​ក្នុងនោះ​អតីត​ខ្សែប្រយុទ្ធ Chelsea មួយរូប​ទៀត Olivier Giroud រកបាន​ពីរ​គ្រាប់​ម្នាក់ឯង​។ ​Sandro Tonali និង Rafael Leao រកបាន​ម្នាក់​មួយគ្រា​ប់​មុនពេល​ដែល Olivier Giroud រកបាន​ពីរ​គ្រាប់​នៅ​នាទី​ទី២៤ និងនាទី​ទី៤៣ ដោយ​បាល់ ១១ម៉ែត្រ​។ ​AC Milan ក៏​ឈ្នះ​ពីរ​ប្រកួត​ជាប់​គ្នា​ដែរ​រដូវ​កាល​ថ្មី​នេះ​មាន ៦ពិន្ទុ​ពេញ​ដូចគ្នា​នឹង Inter Milan, Lazio និង Napoli លើកលែងតែ Juventus ដែល​មិន​ស្គាល់​ឈ្នះ​នៅឡើយ​ក្រោយ​ស្មើ​ប្រកួត​ដំបូង និង​ចាញ់ Empoli ក្នុង​ដី​ខ្លួនឯង ១-០ កាលពី​ថ្ងៃ​សៅរ៍​៕

​អត្ថបទ​៖​នាង សុភា​វុ​ធ