រដ្ឋមន្ត្រីការបរទេសរបស់ប្រទេសដាណឺម៉ាក បាននិយាយនៅថ្ងៃព្រហស្បតិ៍នេះថា ប្រទេសនេះនឹងមិនបញ្ជូនរដ្ឋមន្ត្រីទៅកិច្ចប្រជុំរដ្ឋាភិបាលក្រៅផ្លូវការដែលមានភ្ជាប់ទំនាក់ទំនងជាមួយប្រធានសហភាពអឺរ៉ុប (EU) របស់ប្រទេសហុងគ្រីក្នុងខែនេះនោះទេ ដើម្បីបង្ហាញការតវ៉ា ចំពោះកិច្ចពិភាក្សារបស់នាយករដ្ឋមន្ត្រី លោក Victor Orban ជាមួយប្រធានាធិបតីរុស្ស៊ី និងចិន។

គួរបញ្ជាក់ថា លោក Orban បានជួបពិភាក្សាស្ដីពីកិច្ចព្រមព្រៀងសន្តិភាពអ៊ុយក្រែន នាពេលខាងមុខ ជាមួយប្រធានាធិបតីរុស្ស៊ី លោក Vladimir Putin និងប្រធានាធិបតីចិន លោក Xi Jinping ក្នុងឱកាសដាច់ដោយឡែកពីគ្នា កាលពីដើមខែនេះ ដោយការធ្វើបែបនោះបាននាំឲ្យមានការខឹងសម្បាពីមេដឹកនាំ EU មួយចំនួន ដែលបានព្រមានប្រឆាំងនឹងការបន្ទន់ឥរិយាបថជាមួយទីក្រុងម៉ូស្គូ ហើយបានប្រាប់ថា លោក Orban មិនបាននិយាយតំណាងឲ្យប្លុកដែលមានសមជិក ២៧ប្រទេសនោះទេ។

ហើយសភាអឺរ៉ុបកាលពីថ្ងៃពុធ (ទី១៧ ខែកក្កដា) បានអនុម័តសេចក្ដីសម្រេចមួយ ដែលបានថ្កោលទោសចំពោះដំណើរទស្សនកិច្ចទៅរុស្ស៊ីរបស់លោក Orban ដោយបញ្ជាក់ថា សភាសហភាពអឺរ៉ុប «ពិចារណាថា ការរំលោភនេះ គួរតែត្រូវបានឆ្លើយតបដោយផលអាក្រក់ដល់ប្រទេសហុងគ្រី»៕