ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួង​សុខាភិបាល ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បាន​ទទួល​ជួប​សមាគម​មិត្តភាពកម្ពុជា-ហ្វូគូស៊ីម៉ា ដែលដឹកនាំដោយ ឯកឧត្តម Iwaki Mitsuhide អតីតរដ្ឋមន្ត្រីក្រសួងយុត្តិធម៌ជប៉ុន និងជាប្រធានសមាគម, នារសៀលថ្ងៃទី១៨ ខែកក្កដា ឆ្នាំ២០២៤។

ឯកឧត្តមសាស្ត្រាចារ្យរដ្ឋលេខាធិការ បានស្វាគមន៍ និងថ្លែងអំណរគុណដល់ ឯកឧត្តម Iwaki Mitsuhide ប្រធានសមាគមមិត្តភាពកម្ពុជា-ហ្វូគូស៊ីម៉ា ដែលបានមកបំពេញទស្សនកិច្ចនៅកម្ពុជា ដើម្បីស្វែងយល់អំពីវិស័យសុខាភិបាលនៅកម្ពុជា ជាពិសេសពាក់ព័ន្ធនឹងការព្យាបាលជំងឺទឹកនោមផ្អែម ការថែទាំមនុស្សចាស់ និងបង្កើនកិច្ចសហការក្នុងវិស័យសុខាភិបាលរវាងជប៉ុន និងកម្ពុជា។

ឯកឧត្តម Iwaki Mitsuhide បានជម្រាបជូនអង្គប្រជុំថា សមាគមនេះបង្កើតឡើងដើម្បីពង្រីកការយល់ដឹងអំពីប្រទេសកម្ពុជា ជម្រុញការផ្លាស់ប្តូរសេដ្ឋកិច្ច វប្បធម៌ និងលើកកម្ពស់មិត្តភាពរវាងខេត្តហ្វូគូស៊ីម៉ា ជាមួយព្រះរាជាណាចក្រកម្ពុជា។

ឯកឧត្តម Iwaki Mitsuhide បានបន្ថែមទៀតថា ឯកឧត្តម និងក្រុមការងារមកបំពេញទស្សនកិច្ចនៅព្រះរាជាណាចក្រកម្ពុជា ចាប់ពីថ្ងៃទី១៧ ដល់ថ្ងៃទី២១ ខែកក្កដា ឆ្នាំ២០២៤ ដើម្បីស្វែងយល់ពីវិស័យសុខាភិបាលកម្ពុជា ជាពិសេសការការពារ និងព្យាបាលជំងឺទឹកនោមផ្អែម និងស្វែងរកកិច្ចសហប្រតិបត្តិការលើវិស័យសុខាភិបាល ក៏ដូចជាការលើកកម្ពស់វិស័យសុខាភិបាលរវាងប្រទេសជប៉ុន និងកម្ពុជាផងដែរ។

ក្នុងនាម ឯកឧត្តមសាស្ត្រាចារ្យរដ្ឋមន្ត្រី ឯកឧត្តមសាស្ត្រាចារ្យរដ្ឋលេខាធិការ បានថ្លែងអំណរគុណដល់ សមាគមមិត្តភាពកម្ពុជា-ហ្វូគូស៊ីម៉ា ជាពិសេស ឯកឧត្តម Iwaki Mitsuhide ប្រធានសមាគម ដែលបានមកបំពេញទស្សនកិច្ចនៅកម្ពុជា សំដៅចូលរួមជាមួយកម្ពុជាក្នុងកិច្ចសហការលើវិស័យសុខាភិបាល អំពីការផ្លាស់ប្តូរបទពិសោធន៍ការព្យាបាលជំងឺទឹកនោមផ្អែម និងការថែទាំមនុស្សចាស់។

ឯកឧត្តមសាស្ត្រាចារ្យរដ្ឋលេខាធិការ បានជម្រាបជូនគណៈប្រតិភូអំពីចំនុចអាទិភាព និងផែនការយុទ្ធសាស្ត្ររបស់វិស័យសុខាភិបាល។ ក្នុងនាមក្រសួងសុខាភិបាល ឯកឧត្តមសាស្ត្រាចារ្យបានស្នើសុំភាគីជប៉ុនបញ្ជូនអ្នកជំនាញការជប៉ុនមកចូលរួមរៀបចំ ជាមួយអ្នកជំនាញកម្ពុជាបង្កើតបន្ថែមអំពីសម្ភារៈអប់រំលើការបង្ការជំងឺទឹកនោមផ្អែម ការថែទាំព្យាបាល ក៏ដូចជាការចែករំលែកស្វែងយល់អំពីគោលនយោបាយសេវាថែទាំមនុស្សចាស់ ព្រមទាំងពិចារណារកលទ្ធភាពផ្តល់អាហារូបករណ៍ដល់មន្រ្តីសុខាភិបាលបានរៀនសូត្របន្ថែម។ ឯកឧត្តមបានបញ្ជាក់ពីគោលជំហរគាំទ្រសមាគមមិត្តភាពកម្ពុជា-ហ្វូគូស៊ីម៉ា ដើមី្បរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល ក៏ដូចជារាជរដ្ឋាភិបាលកម្ពុជា ក្នុងការលើកកម្ពស់គុណភាពសេវាសុខាភិបាល និងយកចិត្តទុកដាក់ខ្ពស់ពីសុខុមាលភាពប្រជាជនកម្ពុជា ឱ្យឈានទៅសម្រេចបាននូវការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕ អត្ថបទ រដ្ឋា